रस्ते गेले खड्ड्यात; पाणी साचतेय डबक्यात

वाशिम : शहरातील पुसद नाक्यापासून रेल्वे गेटपर्यंतच्या रस्त्याची अक्षरश: चाळण झाली असून, मोठ मोठे खड्डे पडले आहेत. सततच्या पावसामुळे खड्ड्यांचे रूपांतर घाण पाण्याच्या डबक्यांमध्ये झाल्याने वाहनचालक, नागरिकांची गैरसोय होत आहे. दरम्यान, या रस्त्याची तत्काळ दुरुस्ती करावी; अन्यथा तीव्र आंदोलन करू, असा इशारा सामाजिक कार्यकर्ते राम ठाकरे यांनी दिला आहे.

पुसद नाक्यापासून रेल्वे गेटपर्यंतच्या रस्त्याचे काम मागील अनेक वर्षांपासून संथ गतीने सुरू आहे. या कामादरम्यान दोन्ही बाजूच्या रस्त्यांची दयनीय अवस्था झालेली आहे. या मार्गावर शाळा, हॉटेल्स, दवाखाने व इतर व्यावसायिक कार्यालये असल्याने वाहनांची नियमित वर्दळ असते. जड वाहने देखील मोठ्या प्रमाणात ये-जा करतात. सततच्या पावसामुळे रस्त्यावरील खड्ड्यांमध्ये पावसाचे पाणी साचून राहत आहे. पाण्याचा अंदाज येत नसल्याने दैनंदिन अपघाताच्या घटना घडत आहेत. ही बाब लक्षात घेता बांधकाम विभागाने रस्ता दुरुस्तीकडे लक्ष द्यावे, अशी मागणी होत आहे.

..............

नवरात्रोत्सवात राहते रस्त्यावर गर्दी

रेल्वे गेटपासून जवळच महाकाली देवीचे मंदिर वसलेले आहे. आगामी काही दिवसांत नवरात्रोत्सवास सुरुवात होणार असून मंदिराकडे जाणाऱ्या भाविकांची रस्त्यावर दैनंदिन गर्दी राहणार आहे. या काळात रस्ता नादुरुस्तीमुळे विशेषत: महिलांची होणारी गैरसोय टाळण्यासाठी रस्ता दुरुस्ती करण्याची मागणी होत आहे.

..................

कोट :

रस्त्याची दुरुस्ती करण्यासंबंधी यापूर्वी विविध राजकीय पक्ष, संघटनांनी बांधकाम विभागाकडे वारंवार तक्रारी दाखल केल्या; मात्र त्याकडे कुणीच लक्ष दिले नाही. आता मात्र संयम संपला असून रस्त्याची तत्काळ दुरुस्ती न केल्यास तीव्र आंदोलन उभारण्यात येईल.

-राम ठाकरे, सामाजिक कार्यकर्ते, वाशिम