पावसाने सरासरी अपेक्षित ओलांडली

जिल्ह्यात सर्व मिळून जून ते सप्टेंबरअखेर ७८९ मि.मी. पाऊस अपेक्षित असतो. त्यात १ जून ते ३ सप्टेंबरदरम्यान ६८०.४० मि.मी. पाऊस अपेक्षित असताना यंदा याच कालावधीत ७१४.९ मि.मी. पावसाची नोंद जिल्ह्यात होऊ शकली आहे. अर्थात आजवरच्या सरासरीपेक्षा ८ टक्के अधिक पाऊस जिल्ह्यात पडला आहे. जिल्ह्याची सरासरी दमदार असली तरी तालुक्यांच्या स्वतंत्र सरासरीत मात्र वाशिम आणि कारंजा तालुक्यात आजवरच्या सरासरीपेक्षा कमी पावसाची नोंद झाली आहे. आजवरच्या अपेक्षित सरासरीनुसार कारंजात ७ टक्के पावसाची तूट आहे, तर वाशिम तालुक्यात पावसाची ११ टक्के तूट आहे. दरम्यान, पिकांची स्थिती मात्र सध्या समाधानकारक असून, या दोन तालुक्यांतील काही महसूल मंडळात पावसाने सरासरी ओलांडली आहे. पुढील महिनाभराच्या कालावधीत दमदार पाऊस न पडल्यास ही या तालुक्यातील पावसाची तूट भरून निघू शकणार नाही, तसेच काही गावांत पाणीटंचाईची समस्याही उद्भवण्याची भीती आहे.

-------------------

गतवर्षीपेक्षा ४ टक्के कमी पाऊस

जिल्ह्यात वार्षिक सरासरी ७८९.०० मि.मी. पाऊस अपेक्षित असतो, तर १ जून ते ३ सप्टेंबरदरम्यान ६८०.४० मि.मी. पाऊस अपेक्षित असताना ७१४.९ मि.मी. पावसाची नोंद झाली आहे. गतवर्षी याच कालावधीत कारंजा तालुक्यात ७४४.२ मि.मी. पावसाची नोंद झाली होती. अर्थात गतवर्षी उपरोक्त कालावधीतील अपेक्षित सरासरीपेक्षा १२.७० टक्के अधिक पाऊस पडला होता. यंदा मात्र गतवर्षीच्या तुलनेत पावसाचे प्रमाण ४ टक्के कमी आहे.

-------------------

जिल्ह्यातील पावसाची स्थिती

-१ जून ते ३० सप्टेंबर अपेक्षित पाऊस - ७८९.०० मि.मी.

-१ जून ते ३ सप्टेंबर अपेक्षित पाऊस - ६८०.४० मि.मी.

-१ जून ते ३ सप्टेंबर प्रत्यक्ष पाऊस - ७१४.९ मि.मी.