पालकांनो सावधान, बालकांना जडतोय ‘मिस-सी’ आजार!

संतोष वानखडे

वाशिम : कोरोनाची दुसरी लाट ओसरत नाही; तेच बालकांमध्ये ‘मिस-सी’ आजाराची लक्षणे आढळून येत आहेत. जिल्ह्यातील ३० पेक्षा अधिक बालके या आजाराचा सामना करत असल्याने पालकांची चिंता अधिकच वाढत आहे.

कोरोनाची दुसरी लाट ओसरत असल्याने जिल्हावासियांना दिलासा मिळत आहे. मात्र, ‘व्हायरल फिव्हर’मुळे हा दिलासाही तात्पुरता ठरत असून, नव-नव्या आजारांची लक्षणे आढळून येत असल्याने नागरिकांची डोकेदुखी थांबलेली नसल्याचे दिसून येते. वातावरणात बदल होत असल्याने सध्या बालकांमध्ये ‘व्हायरल फिव्हर’चे प्रमाण वाढत आहे. सर्दी, ताप, खोकला, डोकेदुखी आदी आजाराने १५ वर्षांआतील बालके त्रस्त असल्याने पालकांची चिंताही वाढत आहे. त्यातच ‘मिस-सी’ आजाराची लक्षणे काही बालकांमध्ये आढळून येत असल्याने आरोग्य क्षेत्रही ढवळून निघत आहे. विविध आजारांच्या उपचारार्थ बालरुग्णालयांत गर्दी होत असून, काही बालकांमध्ये ‘मिस-सी’सदृश लक्षणे आढळत आहेत. डोळे व जीभ लाल होणे, जीभेवर सूज तसेच दोन्ही पाय सुजणे, अंगावर लाल रंगाचे पुरळ येणे, रक्तदाब कमी होणे अशी लक्षणे असलेल्या ‘मिस-सी’ आजाराने आरोग्य क्षेत्रासमोरही जणू नव्याने आव्हान निर्माण केले आहे. त्यामुळे बालकांना कोणत्याही आजाराची लक्षणे दिसून येताच, तातडीने डॉक्टरांचा सल्ला घेणे आवश्यक ठरत आहे.

००००००

बॉक्स

‘मिस-सी’ आजाराची लक्षणे काय?

डोळे लाल होणे

जीभ लाल होणे

जीभेवर सूज येणे

अंगावर लाल रंगाचे पुरळ येणे.

दोन्ही पायांवर सूज येणे.

रक्तदाब कमी होणे.

शॉकमध्ये जाण्याची शक्यता.

हृदयविकाराचा झटका येऊ शकतो.

००००००००००

डॉक्टर म्हणतात बालकांची काळजी घ्या!

कोट

कोरोनाची दुसरी लाट ओसरत असली तरी तिसऱ्या लाटेची शक्यता वर्तविण्यात येत आहे. त्यामुळे बालकांच्या आरोग्याकडे लक्ष देणे आवश्यक आहे. काही बालकांमध्ये ‘मिस-सी’ आजाराची लक्षणे आढळत आहेत.

- डॉ. विजय कानडे,

बालरोग तज्ज्ञ, वाशिम

०००००

१५ वर्षांआतील बालकांमध्ये व्हायरल फिव्हर तर आहेच; याशिवाय ‘मिस-सी’ आजाराची लक्षणेदेखील आढळून येत आहेत. त्यामुळे पालकांनी बालकाच्या आरोग्याबाबत अधिक सतर्क राहणे अपेक्षित आहे.

- डॉ. प्रवीण वानखेडे

बालरोग तज्ज्ञ, वाशिम

००००

बालकांना वेळीच उपचार मिळाले तर ‘मिस-सी’ आजार लवकर नियंत्रणात येऊ शकतो. त्यामुळे डोळे व जीभ लाल होणे, अंगावर पुरळ येणे, रक्तदाब कमी होणे आदी लक्षणे आढळून आल्यास तातडीने डॉक्टरांचा सल्ला घ्यावा.

- डॉ. रत्नेश परळकर

बालरोग तज्ज्ञ, वाशिम