तीन वाहनांच्या अपघातात एक ठार; चार जखमी

मालेगाव तालुक्यातील मुंगळा फाट्यावरील घटना; जखमींमध्ये दोन लहान मुलांचा समावेश.

मालेगाव (जि. वाशिम), दि. १२ : एस.टी. बस, कंटेनर आणि दुधाची वाहतूक करणारा ट्रक अशा तीन वाहनांच्या विचित्र अपघातात एक जण ठार झाला असून, चार जण जखमी झाले आहेत. ही घटना मालेगाव-मेहकर मार्गावरील मुंगळा फाट्यावर सोमवार, १२ सप्टेंबर रोजी सायंकाळी सहाच्या सुमारास घडली.
याबाबत अधिक माहितीनुसार, दूध घेऊन जाणारा राजहंस कंपनीचा ट्रक (क्रमांक एमएच १७, ३९८४) मालेगावकडे येत असताना मेहकरकडे जाणारा मोठा कंटेनर आणि मालेगावच्या दिशेने येणारी शिर्डी-मंगरूळपीर (क्रमांक एमएच ४0 वाय ५३५४) या बसमध्ये भीषण अपघात झाला. यात दूध वाहतूक करणार्‍या ट्रकचा चालक लक्ष्मण तोरे (रा. संगमनेर) हा जागीच ठार झाला. तसेच ट्रकमध्ये असलेला किनर सुरेश पटोळे जखमी झाला असून, वंदना अनिल कुरवाडे (रा. सोनाटी) या महिलेच्या पायाला जबर मार लागला. यासह अनिल दत्ता कुरवाडे (वय १५), शुभम अनिल नरवाडे (वय १५) ही दोन मुलेही जखमी झाली. घटनेची माहिती मिळताच मालेगाव पोलीस स्टेशनचे कर्मचारी आणि शिवसेना रुग्ण वाहिकाचे किरण चांगाडे, सुरेश झोंबडे, मुख्तार आणि गावकर्‍यांनी घटनास्थळी धाव घेऊन युद्धस्तरावर बचावकार्य केले. सर्व जखमींना प्राथमिक उपचारासाठी मालेगावच्या ग्रामीण रुग्णालयात आणण्यात आले. तेथून १0८ क्रमांकाच्या अँम्बुलन्समधून अकोला येथे हलविण्यात आले. याबाबत पुढील तपास मालेगाव पोलीस स्टेशनचे कर्मचारी करीत आहेत.