महावितरणच्या उपकार्यकारी अभियंत्यावर हल्ला

कारंजातील पेट्रोल पंपनजीकची घटना; गुन्हा दाखल.

कारंजा लाड (जि. वाशिम): वीज वितरण कंपनीचे कारंजा येथील उपकार्यकारी अभियंता अजय महादेवराव पिंगे यांच्यावर अज्ञात हल्लेखोरांनी सशस्त्र हल्ला केला. या हल्ल्यात अभियंता पिंगे जखमी झाले असून, त्यांच्या कारचे नुकसान झाले आहे. ही घटना मंगळवार ८ सप्टेंबर रोजी रात्री ९.१५ वाजताच्या सुमारास शहरापासून चार किलोमीटर अंतरावर असलेल्या नागपूर-औरंगाबाद द्रुतगती मार्गावरील पेट्रोल पंपजवळ घडली.
वीज वितरण कंपनीचे उपकार्यकारी अभियंता अजय महादेवराव पिंगे (४२) हे मंगळवारी रात्री ९ वाजताच्या सुमारास शहरातील काण्णव जीनमध्ये असलेल्या कार्यालयातून जेवण करण्यासाठी मंगरूळपीर रस्त्यावरील रिलायन्स पेट्रोल पंपनजीक असलेल्या हॉटेल तिरूमला येथे गेले होते. तेथून परत येत असताना सावरकर चौक मार्गे महावीर ब्रह्मचर्य आश्रममधील निवासस्थानी चालले होते.
दरम्यान, मार्गात पेट्रोल पंपासमोर रस्त्याच्या डाव्या बाजूूला असलेल्या झुडुपातून अचानक एक अज्ञात व्यक्ती त्यांच्या एमएच ३0 पी २३२0 क्रमांकाच्या धावत्या कारसमोर आला व काठी मारून समोरील हेडलाईट फोडला. कार थांबताच लगेच कारच्या दोन्ही बाजूंनी दोन व्यक्ती आल्या आणि त्यांनी काठीने व फायटरसारख्या शस्त्रांनी पिंगे यांच्या पाठ, छाती व हातावर हल्ला केला. या घटनेत उपकार्यकारी अभियंता पिंगे जखमी झाले. त्यानंतर तिन्ही अज्ञात हल्लेखोरांनी घटनास्थळावरून पोबारा केला. जखमी अवस्थेतील पिंगे यांनी घटनेची माहिती सहायक अभियंता सुशीलकुमार शुक्ला यांना भ्रमणध्वनीवरून दिली. त्यांनी वीज कंपनीच्या कर्मचार्‍यांसह घटनास्थळ गाठले व तत्काळ पिंगे यांना उपचारासाठी येथील खासगी रुग्णालयात दाखल केले. या प्रकरणी उपकार्यकारी अभियंता अजय पिंगे यांच्या फिर्यादीवरून शहर पोलिसांनी अज्ञात आरोपीविरूद्ध गुन्हा दाखल केला आहे. घटनेचा तपास पोलीस निरीक्षक राजेंद्र पाटील यांच्या मार्गदर्शनात जमादार सुधाकर पवार करीत आहेत.