अंगणामधील रोपे निर्मितीतून उभारली आधुनिक रोपवाटिका

वाशिम : जिल्ह्यातील जास्तीत जास्त शेतकरी सोयाबीन व तुरीचे पीक घेत असताना मंगरूळपीरनजीक असलेल्या जांब शिवारात शेडनेट व पॉली हाऊसच्या माध्यमातून सरला मोहिते या सुशिक्षित शेतकरी महिलेने नावीन्यपूर्ण साई रोपवाटिकेच्या माध्यमातून भाजीपालावर्गीय व पपई रोपांची निर्मिती करून जिल्ह्यातीलच नव्हे तर शेजारच्या जिल्ह्यातील शेतकऱ्यांना नगदी पिकाचा मार्ग दाखविला आहे.

सरला मोहिते यांची शेलूबाजारजवळ असलेल्या घुगरी या गावी ५ एकर शेती. सरला मोहिते यांचे पती रमेश मोहिते हे मानोरा तालुक्यातील मानोली येथे खाजगी शाळेत शिक्षक आहेत. सरला यांना शेती करण्यासाठी त्यांच्या पतीचे प्रोत्साहन आणि पाठबळदेखील मिळाले. सरला मोहिते यांचे शिक्षण बी.ए. पदवीपर्यंत झाले. पतीच्या अर्थार्जनात आपलाही वाटा असला पाहिजे, असे त्यांना नेहमी वाटायचे. रोपे निर्मिती करण्याची त्यांची आवड त्यांना एक चांगला आदर्श शेतकरी बनवेल, असे त्यांना कधी वाटले नाही. सन २००५ मध्ये मंगरूळपीर येथील वैष्णवीनगरात घरी असलेल्या खुल्या जागेत सन २००५-०६ ते सन २००८-०९ या कालावधीत पपईची रोपे तयार करून विक्री केली. रोपे विक्री व्यवसायात आपण चांगली प्रगती करू शकतो, असा विश्वास पपईच्या रोपे निर्मितीतून निर्माण झाला. त्यामुळे मंगरूळपीरच्या पश्चिम दिशेला असलेल्या जांब शिवारात सन २००९ मध्ये २ एकर पडीक जमीन विकत घेतली. या जमिनीवर चांगली मशागत करून विविध प्रकारच्या रोपे निर्मितीला सुरुवात केली. त्यानंतर तिथेच २ एकर शेती सन २०१० मध्ये खरेदी केली. सन २०१२ मध्ये पुन्हा एक एकर व सन २०१९ मध्ये एक एकर शेती घेतली. अशी एकूण ६ एकर शेती जांब शिवारात खरेदी केली. सरला मोहिते यांनी साई रोपवाटिकेच्या माध्यमातून सन २००५ पासून रोपे तयार करण्याला सुरुवात केली. घरी पूर्वी थोडीफार असलेल्या शेतातून आणि घरी असलेल्या मोकळ्या जागेत रोपे तयार करून घरच्या अर्थकारणात आपलाही वाटा असला पाहिजे, या जाणिवेतून सरला मोहिते यांनी साई रोपवाटिकेतून विविध रोपांची निर्मिती करून नवीन असा शेतीपूरक व्यवसाय सुरू करून अनेक महिला शेतकऱ्यांसाठी आदर्श निर्माण केला आहे.

----

कृषी क्षेत्रातील उल्लेखनीय कार्याबद्दल माेहिते यांना राज्य शासनाचा पुरस्कार

कृषी क्षेत्रातील त्यांच्या या उल्लेखनीय कार्याची दखल घेऊन राज्य शासनाने सरला रमेश मोहिते यांना सन २०१९-२० या वर्षाच्या वसंतराव नाईक शेतीनिष्ठ शेतकरी पुरस्काराने १ जुलै २०२१ रोजी कृषीदिनी अकोला येथील डॉ. पंजाबराव देशमुख कृषी विद्यापीठात गौरविण्यात आले आहे.

----

लाखाे रुपयांचे अनुदान

सन २००६ मध्ये तयार केलेली तायवान पपईची रोपे बघून ६५ हजार रुपयांची तायवान पपईची रोपे तयार करण्याची त्यांना ऑर्डर मिळाली. सन २०१२ मध्ये कृषी विभागाच्या संरक्षित शेती योजनेतून २० गुंठे जमिनीवर ७ लक्ष रुपयांतून शेडनेट तयार करण्यात आले. याकरिता ३ लक्ष रुपये अनुदान मिळाले. सन २०१४ मध्ये संरक्षित शेती योजनेतून २० गुंठे जमिनीवर १६ लक्ष रुपयांचे पॉली हाऊस तयार करण्यात आले. याकरिता ८ लक्ष रुपये अनुदान मिळाले.