नकाशात नसतानाही तहसीलदाराच्या आदेशाने काढला शेतातून रस्ता

मंगरुळपीर तालुक्यातील सार्सी बोथ येथील रहिवासी रामहरी भोयर व किसन भोयर यांची सार्सी गट क्रमांक १०१ शेतशिवारात शेतजमीन असून, गट क्रमांक ११३ मध्ये जाण्यासाठी रस्ता अडवल्याची तक्रार त्यांच्या विरोधात गैरअर्जदारांनी दाखल केली. हे प्रकरण न्यायप्रविष्ट असून, मध्यंतरी तत्कालीन तहसीलदार बागडे यांनी कोविड-१९ संसर्ग असल्यामुळे प्रकरण सुनावणीकरिता घेतले नाही; परंतु विद्यमान तहसीलदारांनी २८ ऑगस्ट रोजी साप्ताहिक सुटी असताना पोलीस बंदोबस्तासह गैरअर्जदाराला शेतात पाठवले. त्यातही रस्ता हा धुऱ्याने देण्याचे आदेशात नमूद असताना गैर अर्जदाराने शेतामधील उभे असलेले पीक ट्रॅक्टरने नेस्तनाबूत करून रस्ता काढला. विरोध केला असता शासकीय कामात अडथळा आणल्याप्रकरणी कारागृहात टाकण्याची धमकी उपस्थित अधिकारी, कर्मचाऱ्यांनी दिली. हा सर्व प्रकार बेकायदेशीर असून, तहसीलदारांच्या पाठबळामुळेच हा प्रकार घडल्याचा आरोप तक्रारकर्ते रामहरी भोयर व किसन भोयर यांनी केला आहे, तसेच आसेगाव पोलिसांत या प्रकरणाची तक्रार दाखल करण्याचा प्रयत्न केला; परंतु त्यांनीही तक्रार दाखल करून घेतली नाही, असेही त्यांनी निवेदनात नमूद केले आहे.

०००००००००००००००००

कोट : सार्सी बोथ येथील शेतरस्त्याप्रकरणी केलेली कार्यवाही ही नियमाला अनुसरून आणि कायद्यानुसारच केली आहे. कोणालाही त्रास देण्याच्या उद्देशाने वा आकसापोटी ही कार्यवाही केलेली नाही.

-नरसय्या कोंडागुर्ले,

तहसीलदार, मंगरुळपीर

००००००००००००००००००००

कोट: सार्सी बोथ येथील गट क्रमांक १०१ मधून गट क्रमांकात ११३ मध्ये जाण्यासाठी रस्ता नसल्याचे भूमी अभिलेख विभागाच्या नकाशावरून स्पष्ट होते. याप्रकरणी न्यायालयात दाखल प्रकरणाचा निकाल प्रलंंबित असतानाही शेतातून नियमबाह्य पद्धतीने रस्ता काढण्याची कार्यवाही करण्यात आली.

-रामहरी भोयर,

शेतकरी, सार्सी