‘डम्पिंग यार्ड’ बनलेल्या तलावाला ‘जीवनदान’

लोकसहभागाचा परिणाम: गाळ उपसण्याचे काम वेगात.

मंगरुळपीर : शहरातील प्राचीन गावतलावाचा मागील काही वर्षांंपासून कचरा टाकण्यासाठी (डम्पिंग यार्ड) उपयोग होत होता. त्यामुळे कधीकाळी शहराच्या जलसाठय़ात महत्त्वाचे स्थान असलेल्या या तलावाला डम्पिंग यार्डचे स्वरूप प्राप्त झाले होते; मात्र शहरातील काही समाजसेवकांनी एकत्रित येऊन आर्ट ऑफ लिव्हिंग या सामाजिक संघटनेच्या सहकार्याने गेल्या आठ ते दहा दिवसात या तलावातील हजारो ब्रास गाळाचा उपसा केला. त्यामुळे शेवटच्या घटका मोजत असलेल्या या तलावाला जीवनदान मिळाल्याचे दिसत आहे.
मंगरुळपीर शहरातील पालिकेच्या शाळा क्रमांक दोन लगत असलेला गाव तलाव या भागातील जलपातळी वाढविणारा एकमेव घटक आहे. सन १९७२ च्या काळात डॉ. संजीव वार्डेकर हे नगराध्यक्ष असतानाचे काळात तलावाला भरपूर पाणी असायचे, त्याकाळात तलाव शहराचे वैभव बनला होता. तलावातील जलभरणामुळे आजूबाजूच्या परिसरातील विहिरी व बोअरवेलची जलपातळी भरपूर प्रमाणात वाढत चालली होती. नंतरच्या काळात मात्र तलावाकडे जणू सर्वांंचेच दुर्लक्ष होत राहिले. त्यामुळे तलावाचे अस्तित्व संपण्याच्या मार्गावर होते. अनेकांना मनोमन वाटूनही त्यांना काही करता येत नव्हते. त्यामुळे हा तलाव कायमचा नाहीसा तर होणार नाही अशी चिंता सर्वसामान्यांना सतावत होती. अशातच समाजसेवक सचिन कुळकर्णी यांच्या पुढाकारातून या तलावाच्या जीवदान अभियानाला सुरुवात करण्यात आली, जलपुनर्भरणासाठी नावाने हे अभियान राबविण्यासाठी आर्ट ऑफ लिव्हिंग परिवाराचे देवेंद्र पाटील, दीपक लोहिया, बबलू गावंडे, विवेक चव्हाण, डॉ. बियाणी, सतीश रत्नपारखी, दिनेश राठोड, आत्माराम चव्हाण, मनोज इंगोले, प्रा. अरुण इंगळे, प्रा. वीरेंद्रसिंह ठाकूर याच्यासह मान्यवरांनी सहभाग घेऊन जल चळवळीला गाठ उपशाचे काम गेले आठ ते दहा दिवसांपासून अविरत सुरू आहे. जवळपास हजारो ब्रास गाळाचा उपसा करण्यात आला असून, दोन टिप्पर व पाच ट्रॅक्टरच्या माध्यमातून अहोरात्र गाळाचा उपसा सुरू आहे. तलावाच्या पुनर्भरणासाठी मदतीचे अनेक हात पुढे सरसावत असल्याने काम करणार्‍यांनाचा उत्साहसुद्धा वाढत चालला आहे.