शासकीय रुग्णालयांत लसीकरणासाठी उसळली गर्दी

राज्यभरात कोरोना संसर्गाचा उद्रेक सुरू झाला आहे. ज्येष्ठ नागरिक आणि मधुमेह, दमा, उच्च रक्तदाबासह इतर गंभीर आजार असलेल्या व्यक्तींना त्यामुळे असलेला धोका लक्षात घेत आरोग्य विभागाने १ मार्चपासून शासकीय केंद्रात मोफत कोरोना प्रतिबंधक लस देण्यास सुरुवात केली आहे. जिल्ह्यात सहा शासकीय रुग्णालयांत ही मोहीम राबविली जात आहे. यासाठी ज्येष्ठ नागरिक आणि गंभीर आजारग्रस्तांची मोबाईल अ‍ॅपसह प्रत्यक्ष केंद्रांवर नोंदणी केली जात असून, या मोहिमेला मोठा प्रतिसाद मिळत असल्याने मंगळवारी शासकीय रुग्णालयात लस टोचून घेण्यासाठी ज्येष्ठ नागरिकांची मोठी गर्दी उसळली होती. तथापि, या ठिकाणी योग्य नियोजनच केले नसल्याने फिजिकल डिस्टन्सिंगचा पार फज्जा उडाल्याचे चित्र पाहायला मिळाले.

--------------------

सूचनांकडे नागरिकांचे दुर्लक्ष

कोरोना संसर्ग नियंत्रणासाठी शासनाने ज्येष्ठ नागरिकांना कोरोना प्रतिबंधक लस मोफत उपलब्ध करून दिली. त्यासाठी जिल्ह्यातील सहा शासकीय केंद्रांवर व्यवस्थाही केली असून, कोरोना संसर्ग नियंत्रणासाठी फिजिकल डिस्टन्सिंग महत्त्वाचे असताना त्याचेच पालन नागरिक करत नसून, प्रशासनाने लसीकरण केंद्रांवर सूचना फलक लावल्यानंतरही त्याकडे दुर्लक्ष केले जात आहे. त्यामुळे लसीकरणाचा अर्थच काय, असा प्रश्न उपस्थित होतो.

-------------

लसीकरण कक्षापुरतीच मास्कची तसदी

कोरोना संसर्गापासून स्वत:चा बचाव करण्यासाठी फिजिकल डिस्टन्सिंग जेवढे महत्त्वाचे आहे. त्यापेक्षा अधिक तोंडाला मास्क लावणे महत्त्वाचे आहे. याबाबत गेल्या वर्षभरापासून आरोग्य विभाग आणि प्रशासन जनजागृती करत असून मास्क न लावणाऱ्या लाखो लोकांवर दंडात्मक कारवाईसुद्धा वर्षभरात करण्यात आली असताना प्रत्यक्ष कोरोना प्रतिबंधक लस घेण्यास आलेल्या काहींनी प्रत्यक्ष लसीकरण कक्षात जाताना तंबी दिल्यामुळेच मास्क लावल्याचेही चित्र पाहायला मिळाले.

---------------

कोट :

जिल्ह्यातील सहा शासकीय रुग्णालयांत ज्येष्ठ नागरिक आणि गंभीर आजारग्रस्तांना मोफत लस दिली जात आहे. त्यासाठी रितसर नोंदणी सुरू असून, केंद्रावर फिजिकल डिस्टन्सिंगचे पालन होण्यासाठी सुरक्षा रक्षकही नियुक्त केले आहेत. तथापि, काही मंडळी फिजिकल डिस्टन्सिंगबाबत गंभीर नसल्याने कठोर उपाय करण्यात येतील.

-डॉ. मधुकर राठोड,

जिल्हा शल्यचिकित्सक, वाशिम

पहिल्या दिवशी झालेले लसीकरण

१) जिल्हा सामान्य रुग्णालय, वाशिम ९२

२) उपजिल्हा रुग्णालय, कारंजा २७

३) ग्रामीण रुग्णालय, मंगरुळपीर ५५

४) ग्रामीण रुग्णालय, रिसोड ४३

५) ग्रामीण रुग्णालय, मालेगाव २१

६) ग्रामीण रुग्णालय, मानोरा २३