जिल्ह्यात १४ दिवसांत आढळले २५ कोरोना रुग्ण!

वाशिम : सप्टेंबर महिन्याच्या पंधरवड्यापर्यंत कोरोनाचा आलेख आणखी घसरला असून, गत १४ दिवसांत जिल्ह्यात २५ रुग्ण आढळले. यामुळे जिल्हावासीयांना मोठा दिलासा मिळत आहे.

जिल्ह्यात ३ एप्रिल २०२० रोजी कोरोनाचा पहिला रुग्ण आढळला होता. दुसऱ्या लाटेत जनजीवन प्रभावित झाले होते. जिल्ह्याचे मुख्यालय असलेल्या वाशिम शहरात गतवर्षी जून महिन्यात कोरोनाचा पहिला रुग्ण आढळला होता. पहिल्या लाटेत एप्रिल ते ऑक्टोबर या दरम्यान इतर शहरांच्या तुलनते वाशिम शहरात अधिक संख्येने रुग्ण आढळले होते. दुसऱ्या लाटेत मार्च ते मे २०२१ या कालावधीत वाशिम शहरात कोरोनाबाधितांची संख्या झपाट्याने वाढली होती. ऑक्सिजन व व्हेंटिलेटर बेडसाठी वेटिंगवर राहण्याची वेळ रुग्णांवर आली होती. जून महिन्यापासून कोरोनाची दुसरी लाट ओसरत आहे. सप्टेंबर महिन्यात यामध्ये आणखी घट येत असल्याचे दिसून येते. १ ते १४ सप्टेंबर या १४ दिवसांत जिल्ह्यात २५ कोरोना रुग्ण आढळून आले. या दरम्यान कोरोनामुळे एकही मृत्यू नसल्याने जिल्हावासीयांची चिंता बऱ्याच अंशी कमी होत आहे. जिल्ह्यात प्रतिबंधात्मक उपाययोजनांची प्रभावी अंमलबजावणी आणि नागरिकांचे सहकार्य यामुळे कोरोना स्थिती नियंत्रणात असल्याचे दिसून येते.

००००

बॉक्स

कोरोनाविषयक नियमांचे पालन आवश्यक

कोरोनाच्या तिसऱ्या लाटेची शक्यता तज्ज्ञांकडून वर्तविण्यात येत आहे. त्यामुळे कोरोनाची दुसरी लाट ओसरली असली तरी धोका पूर्णपणे टळलेला नाही. नागरिकांनी यापुढेही कोरोनाविषयक नियमांचे पालन करणे अपेक्षित आहे. कोरोनाला रोखण्यासाठी नागरिकांनी बाजारपेठेत गर्दी करू नये, मास्कचा वापर आणि हात वारंवार धुणे या त्रिसूत्रीचे पालन करणे आवश्यक आहे.

०००००००००००० ०००००००००००

कोट

जिल्ह्यातील कोरोना रुग्णसंख्येत घट होत आहे, ही बाब दिलासादायक आहे. कोरोना विषाणू संसर्गाचा प्रादुर्भाव कमी होत आहे; परंतु धोका अद्याप टळलेला नाही. कोरोलाला रोखण्यासाठी यापुढेही नागरिकांनी कोरोनाविषयक नियमांचे पालन करून प्रशासनाला सहकार्य करावे.

- डॉ. अविनाश आहेर, जिल्हा आरोग्य अधिकारी, वाशिम