पालघर नगर परिषदेला मिळणार अत्याधुनिक मुख्यालय; एकनाथ शिंदे यांचे आदेश

जिल्ह्यातील इतर नगर परिषद मुख्यालयांनाही मिळणार नवी झळाळी

मुंबई : धोकादायक इमारतींमधून मुख्यालयाचे कामकाज चालवणाऱ्या पालघर नगरपरिषदेला त्यासाठी अत्याधुनिक इमारत मिळण्याचा मार्ग मोकळा झाला असून पालघर जिल्ह्यातील अन्य नगरपरिषदांच्या मुख्यालय इमारतींनाही नवी झळाळी मिळणार आहे. त्याचबरोबर या आस्थापनांच्या घनकचरा व्यवस्थापन, पाणी योजना आणि रस्त्यांसाठीच्या योजना मार्गी लागणार आहेत. नगरविकास मंत्री एकनाथ शिंदे यांनी मंत्रालयात झालेल्या एका बैठकीत त्या संदर्भातील आदेश दिले आहेत.

पालघरमधील नगरपरिषदांसमोर विकासकामांबाबतच्या अडचणी नगरविकासमंत्र्यांसमोर मांडण्याकरिता एका बैठकीचे आयोजन करण्यात आले होते. याप्रसंगी खासदार राजेंद्र गावित, आमदार रवींद्र फाटक, श्रीनिवास वनगा, जिल्ह्यातील बहुसंख्य नगरपरिषदांचे नगराध्यक्ष आणि त्यांचे मुख्याधिकारी तसेच जिल्ह्याचे लोकप्रतिनिधी या बैठकीसाठी उपस्थित होते.

आदिवासीबहुल असलेल्या पालघर तालुक्याच्या विकासात निधीच्या अनुपलब्धता हा मुख्य अडसर असल्याचे गाºहाणे या सगळ्या लोकप्रतिनिधींनी नगरविकासमंत्री एकनाथ शिंदे यांच्याकडे मांडली. जल योजना, घनकचरा व्यवस्थापन, गटारे, रस्ते आणि प्रशासकीय इमारतींची अवस्था असे मुद्दे या वेळी चर्चेस आले. शासकीय पदे रिक्त असल्याने प्रशासकीय अडचणी उभ्या राहत असल्याचेही या वेळी सांगण्यात आले. या समस्यांची दखल घेत एकनाथ शिंदे यांनी अधिकाऱ्यांना तातडीने कार्यवाही करण्याचे आदेश दिले.

जव्हारचा पर्यटनस्थळ म्हणून विकास

पालघर जिल्ह्यातील जव्हार हे थंड हवेचे ठिकाण, महाबळेश्वरसारखे विकसित करण्याचा विचारही पालकमंत्र्यांनी या वेळी बोलून दाखवला. त्यासाठी पालघर परिसरात पर्यटनस्नेही वातावरण तसेच सोयी-सुविधा उभारण्याला प्राधान्य देण्याचे आदेश त्यांनी दिले. जव्हार येथे असलेला जुना राजवाडा नगरपरिषदेच्या ताब्यात आला असून पर्यटकांसाठी हॉटेल म्हणून विकसित करण्यासंदर्भात प्राथमिक चर्चाही या वेळी झाली.

वाडा येथे अग्निशमन दल

वाडा येथे होणाऱ्या फटाकेविक्रीच्या व्यवसायात ५०० कोटींची उलाढाल होते. दिवाळीदरम्यान होणाऱ्या या फटाके विक्रीच्या व्यवसायादरम्यान मोठी दुर्घटना होण्याची शक्यता असते. इथे अग्निशमन दलाची विकसित सोय नसल्यामुळे गंभीर परिस्थिती उभी राहू शकते, त्यासाठी तेथे स्वतंत्र अग्निशमन दलाची व्यवस्था असावी, अशी तेथील नगराध्यक्षांची मागणी होती. त्या संदर्भात वाडा येथे अग्निशमन दल उभारणीबाबत चाचपणी करण्याचे निर्देश नगर विकासमंत्री एकनाथ शिंदे यांनी दिले आहेत.