काळाचा घाला! प्रशिक्षणासाठी अहमदाबादला जाणाऱ्या सुवर्णपदक विजेत्या क्रीडा अधिकाऱ्याचा भीषण अपघातात मृत्यू

संभाजी पाटील हे सोमवारी सकाळी पुण्याहून खासगी कारने गुजरात राज्यातील अहमदाबाद येथे प्रशिक्षणासाठी जात होते.

हितेन नाईक 

पालघर: क्रीडा क्षेत्रातील एक चमकता तारा निखळला आहे. पुणे येथील बालेवाडी क्रीडा संकुल येथे क्रीडा अधिकारी (गट-ब) म्हणून कार्यरत असलेले सुवर्णपदक विजेते संभाजी शिवाजी झनझन पाटील (वय २६) यांचा मुंबई-अहमदाबाद महामार्गावर झालेल्या भीषण अपघातात जागीच मृत्यू झाला. प्रशिक्षणासाठी गुजरातला जात असताना मनोर जवळील दुर्वेस येथे त्यांच्या कारला अपघात झाला. या घटनेमुळे क्रीडा क्षेत्रात आणि प्रशासकीय वर्तुळात मोठी हळहळ व्यक्त केली जात आहे.

उभा ट्रक ठरला 'काळ'; महामार्गावरील दुर्लक्ष जीवावर बेतले

मिळालेल्या माहितीनुसार, संभाजी पाटील हे सोमवारी सकाळी पुण्याहून खासगी कारने गुजरात राज्यातील अहमदाबाद येथे प्रशिक्षणासाठी जात होते. सकाळी १० वाजेच्या सुमारास त्यांची कार मुंबई-अहमदाबाद महामार्गावरील दुर्वेस गावच्या हद्दीत आली. यावेळी महामार्गावर डाव्या बाजूला सुरक्षेची कोणतीही काळजी न घेता एक ट्रक उभा करण्यात आला होता. वेगवान कार या उभ्या ट्रकवर पाठीमागून जोरदार धडकली. ही धडक इतकी भीषण होती की कारचा अक्षरशः चक्काचूर झाला आणि संभाजी यांचा जागीच प्राण गेला.

यशोशिखर गाठणारा तरुण अधिकारी

छत्रपती संभाजीनगर येथील पारिजात नगर सिडको कॉलनीचे रहिवासी असलेले संभाजी पाटील हे उच्चशिक्षित आणि अत्यंत कर्तबगार अधिकारी होते. त्यांनी नेमबाजीमध्ये राष्ट्रीय आणि आंतरराष्ट्रीय स्तरावर महाराष्ट्राचे नाव उज्ज्वल केले होते:

२०१८: ५३ व्या ऑल इंडिया रेल्वे शूटिंग स्पर्धेत (२५ मीटर पिस्तूल सांघिक) सुवर्णपदक.

२०१९: ५४ व्या ऑल इंडिया रेल्वे शूटिंग स्पर्धेत वैयक्तिक २५ मीटर शूटिंगमध्ये सुवर्णपदक.

२०२०: मध्य रेल्वे आयोजित चॅम्पियनशिपमध्ये सुवर्णपदक. अशा अनेक स्पर्धांमध्ये त्यांनी प्रथम क्रमांक पटकावून आपल्या कौशल्याची चुणूक दाखवली होती.

महामार्गाचा आणखी एक बळी

मुंबई-अहमदाबाद महामार्गावर उभ्या राहणाऱ्या जड वाहनांमुळे अपघातांची मालिका थांबताना दिसत नाहीये. महामार्गावरील चुकीच्या पद्धतीने उभी केलेली वाहने आणि नियोजनाच्या अभावामुळे आतापर्यंत शेकडो निरपराध प्रवाशांचे बळी गेले आहेत. संभाजी पाटील यांच्या रूपाने एका होतकरू आणि सुवर्णपदक विजेत्या तरुणाचा बळी गेल्याने महामार्ग प्रशासनाच्या कारभारावर पुन्हा एकदा संताप व्यक्त केला जात आहे.

कुटुंबावर दुःखाचा डोंगर

संभाजी यांचे वडील छत्रपती संभाजीनगर येथे मुख्य अग्निशमन अधिकारी तथा अतिक्रमण विभाग प्रमुख म्हणून कार्यरत होते. मुलाच्या अशा अकाली जाण्याने संपूर्ण पाटील कुटुंबावर दुःखाचा डोंगर कोसळला आहे. एक मेहनती, कर्तव्यनिष्ठ आणि खेळाडू वृत्तीचा अधिकारी गमावल्याची भावना बालेवाडी क्रीडा संकुलातील त्यांच्या सहकाऱ्यांनी व्यक्त केली आहे.