सात कारवाईत दीड लाखांचा दारूसाठा जप्त

जिल्ह्यात दारूबंदीकरिता तयार केलेल्या विशेष पथकाने दोन दिवसात सात ठिकाणी कारवाई केली. या कारवाईत १३ जणांना अटक करण्यात आली असून त्यात १ लाख ४८ हजार ८०० रुपयांचा मुद्देमाल जप्त करण्यात आला.

वर्धा : जिल्ह्यात दारूबंदीकरिता तयार केलेल्या विशेष पथकाने दोन दिवसात सात ठिकाणी कारवाई केली. या कारवाईत १३ जणांना अटक करण्यात आली असून त्यात १ लाख ४८ हजार ८०० रुपयांचा मुद्देमाल जप्त करण्यात आला. पोलीस सुत्रांनी दिलेल्या माहितीनुसार, सिंदी (रेल्वे) परिसरातील परसोडी येथे केलेल्या कारवाईत १ लाख २० हजार रुपयांचा मुद्देमाल जप्त करण्यात आला. या कारवाईत चार जणांना अटक करण्यात आली. त्यांची नावे इक्बाल तझबीर अली, दिनेश वासुदेव नेवारे रा. सिंदी (रेल्वे), गजानन घुगरे, रवींंद्र हजारे रा. पवनार अशी असून इस्माईल रा. सिंदी (रेल्वे) हा फरार झाला. सिंदी (मेघे) येथील दारूविक्रेते नागपूर येथून बसने दारू आणत असल्याची माहिती विशेष पथकाला मिळाली. या पथकाने पवनार येथील टी पॉर्इंटवर सापळा रचून माहिती असलेल्या बसची झडती घेतली असता त्यात सुभाष मोतीलाल कळसे रा. इंदिरानगर व अमोल रमेश दांडलेवार रा सिंदी (मेघे) या दोघांच्या हालचालीचा संशय आला. त्यांची झडती घेतली असता त्यांच्या अंगावर मोठ्या प्रमाणात दारूसाठा असल्याचे निदर्शनास आले. या कारवाईत २८ हजार ८०० रुपयांचा दारूसाठा जप्त करण्यात आला आहे. त्याचप्रमाणे इंझापूर येथे केलेल्या कारवाईत पोलिसांनी एम एच ३२ ई ५२१५ क्रमांकाच्या गाडीची झडती घेतली असता तिच्यावर गावठी दारूची वाहतूक करताना बेनिप्रसाद उर्फ विनोद द्वारकाप्रसाद जालान रा. इंझापूर याला अटक करण्यात आली. त्याच्याजवळून १३ हजार रुपयांचा मुद्देमाल जप्त करण्यात आला. राष्ट्रभाषा मार्गावर केलेल्या कारवाईत नानकराम संतानी याला अटक करून ३ हजार ६०० रुपयांचा मुद्देमाल जप्त करण्यात आला. वर्धा शहरातील इंगोले चौक येथे केलेल्या कारवाईत सचिन उर्फ गोलू कोमजपिल्लेवार रा. केळकरवाडी व चेतन उर्फ चिंटू कानेटकर रा. गांधीनगर याला अटक करण्यात आली. या दोघांजवळून २३ हजार २०० रुपयांची दारू व एमएच ३२ डब्ल्यू ३२२० क्रमांकाची दुचाकी असा एकूण ९३ हजार २०० रुपयांचा दारूसाठा जप्त करण्यात आला. पवनार येथे केलेल्या कारवाईत अशोक आत्माराम काटोले व अर्जून सातघरे यांना अटक करून २४ हजारांचा मुद्देमाल जप्त करण्यात आला. वर्धा शहरातील गणेशनगर येथे करण्यात आलेल्या कारवाईत शेख शकीर शेख खलिल रा. आनंद नगर याला अटक करण्यात आली. त्याच्याजवळून २३ हजार रुपयांचा मुद्देमाल जप्त करण्यात आला. ही कारवाई जिल्हा पोलीस अधीक्षक अनिल पारस्कर यांच्या मार्गदर्शनात विशेष पथकाने उपनिरीक्षक गजानन जाधव, एस. बी. मुल्ला, सहायक उपनिरीक्षक अशोक साबळे, हरिदास काकड, दिनेश तुमाने, वैभव कट्टोजवार, संतोष जयस्वाल, संजय भगत, अमरदिप पाटील, राजेश पचारे, आत्माराम भोयर, सुनिता ढाकरे यांनी केली.(प्रतिनिधी)