वडिलांना का मारतो म्हणत...मोठ्याने केली लहान भावाची हत्या

वडिलांसोबत वाद घालून मारहाण करणाऱ्या लहान भावाला मोठ्या भावाने काठीने बेदम मारले. यात गंभीर जखमी झालेल्या लहान भावाचा उपचारादरम्यान मृत्यू झाला. या प्रकरणी आष्टी पोलीस ठाण्यात आरोपीविरुद्ध गुन्हा दाखल करण्यात आला आहे.

ठळक मुद्देआष्टी पोलीस ठाण्यात गुन्हा दाखल

वर्धा : वडिलांना मारहाण करण्याच्या कारणातून मोठ्या भावाने लहान भावाला काठीने बेदम मारहाण केली. यात गंभीर जखमी झालेल्या लहान भावाचा नागपूर येथील रुग्णालयात उपचारादरम्यान मृत्यू झाला. पोलिसांनी या प्रकरणी तिघांना अटक केली आहे. गौरव चौधरी, अशोक चौधरी, लक्ष्मी चौधरी अशी अटक केलेल्यांची नावे आहेत.

नजीकच्या बोटोणा येथील गणपत चौधरी यांची अशोक चौधरी आणि सुभाष चौधरी हे दोन्ही मुले शेजारी राहतात. २८ ऑक्टोबरला गणपत चौधरी हे मोठा मुलगा अशोक यांच्याकडे कामानिमित्त गेले असता लहान मुलगा सुभाष याने वडिलांसोबत वाद करून मारहाण सुरू केली. याप्रसंगी भांडण सोडविण्यासाठी अशोक चौधरी व त्याची पत्नी लक्ष्मी या गेल्या असता संतापलेल्या सुभाषने लक्ष्मी यांच्या हातावर काठीने प्रहार केला. ही बाब अशोक व अशोकच्या मुलाच्या निदर्शनास येताच त्यांनी सुभाष चौधरी यास बेदम मारहाण केली.

हाणामारीची माहिती मिळताच आष्टी पोलिसांनी बोटोणा गाठून जखमींना रुग्णालयाकडे रवाना केले. नागपूर येथील रुग्णालयात उपचार सुरू असताना सुभाष याची प्राणज्योत मालवली. त्यामुळे या प्रकरणी मनुष्यवधाच्या कलमान्वये गुन्हा दाखल करून अशोक चौधरी, लक्ष्मी चौधरी, गौरव चौधरी यांना अटक करण्यात आली आहे. पुढील तपास उपविभागीय पोलीस अधिकारी सुनील साळुंखे यांच्या मार्गदर्शनात ठाणेदार लक्ष्मण लोकरे करीत आहेत.