शेतकऱ्यांना तातडीने मदत जाहीर करा

यंदाच्या हंगामात आर्वी उपविभागातील शेतकऱ्यांवर नापिकीचा सामना करावा लागला. अशातच शासनाकडून शेतमालाला अत्यल्प दर देण्यात येत आहे.

आर्वी : यंदाच्या हंगामात आर्वी उपविभागातील शेतकऱ्यांवर नापिकीचा सामना करावा लागला. अशातच शासनाकडून शेतमालाला अत्यल्प दर देण्यात येत आहे. यामतुळे त्यांच्यावर आर्थिक संकट कोसळले आहे. यामुळे या भागातील शेतकऱ्यांना शासनाच्यावतीने तत्काळ मदत देण्याची मागणी एका निवेदनातून आर्वी शहर काँग्रेस कमिटीच्यावतीने उपविभागीय अधिकारी विलास ठाकरे यांना केली आहे.
आर्वी उपविभागात झालेला अपूरा पाऊस कापसाला योग्य भाव नाही, सोयाबीनची नापिकी व राज्य शासनाने पुरेसे कापूस संकलन केंद्र सुर नसल्याने शेतकऱ्यांची आर्थिक लूट सुरू आहे. या पार्श्वभूमीवर राज्यशासनाच्यावतीने तातडीने आर्थिक संकटात सापडलेल्या शेतकऱ्यांना मदत जाहीर करावी, राज्यात दृष्काळी परिस्थिती असताना भाजपाचे व मंत्री मात्र दौरे करतात. यापुर्वी राज्यात काँग्रेसचे सरकार असताना राज्यातील शेतकऱ्यांना १० हजार कोटींचे पॅकेज जाहीर झाले होते; परंतु विद्यमान राज्यसरकार शेतकऱ्यांना न्याय द्यायला तयार नाही. दृष्काळमध्ये विदर्भातील शेतकरी होरपळून निघत असून केंद्राचे पथक अद्याप दृष्काळग्रस्त भागाची पाहणी करण्यासाठी आले नाही.
मराठवड्याप्रमाणे विदर्भातील शेतकऱ्यांची स्थिती भयावह असून आत्महत्या करण्याशिवाय त्यांच्याकडे पर्याय उपलब्ध नाही. यामुळे शासनाने तातडीने त्यांना मदत जाहीर करावी. सोयाबीन उत्पादकांना हेक्टरी २५ हजार रुपये, कापसाला सहा हजार रुपये क्विंटलचा दर द्यावा, फळबाग शेतकऱ्यांना हेक्टरी ५० हजाराची मदत द्यावी. तसेच जवखेड हत्याकांडाची तातडीने चौकशी करावी आदी मागण्यांचे निवेदन आर्वी शहर काँग्रेस कमिटीच्यावतीने उपविभागीय अधिकाऱ्यांना देण्यात आले.
निवेदन देतेवेळी कमिटीचे प्रा. पंकज वाघमारे, जि.प. सदस्य गजानन गावंडे, प्रा. दापूरकर, ज्ञानेश्वर पडोळे, राजू रत्नपारखी, मधू सवाळे, कृष्णा जाधव, सुधीर वाकोडकर, विलास देशमुख, न.प. सदस्य पे्रमराज पालीवाल, रियाज अन्सारी, शिल्पा चव्हाण, वनमाला निखाडे, कांचन लोहे, लता मोहोड, अश्विन शेंडे, प्रकाश समराम, अतुल खोंडे, राजू भांगे, विशाल साबळे, सागर शिरपूरकर, स्वप्नील तुमस्कर, अभिजित ढाकरेसह कार्यकर्त्यांची यावेळी उपस्थिती होती.(तालुका प्रतिनिधी)