तळेगाव (श्या़पं़) : आष्टी तालुक्यातील काही शिवारात गत काही महिन्यापासून मुरूमाचे मोठ्या प्रमाणात जेसीबीच्या सहाय्याने खोदकाम केले जात आहे़ या गंभीर प्रकाराकडे महसूल विभागातील अधिकाऱ्यांनी दुर्लक्ष केले आहे़ या गौण खनिजच्या चोरीला महसूल विभागातील काही अधिकाऱ्यांचा अप्रत्यक्ष आशीर्वाद असल्याचा आरोप नागरिकांद्वारे केला जात आहे़ आष्टी तालुक्यातील तळेगाव, भारसवाडा, अंतोरा, धाडी, बांबर्डा, थार गावांच्या शिवारात अवैधरित्या मुरूमाचे खोदकाम करून मुरूम चोरीला जात असल्याची माहिती ग्रामस्थ देत आहे. काही शिवारात असलेल्या टेकड्यावर जेसीबीच्या मदतीने खोदकाम केले जात असल्याचे प्रत्यक्ष पाहणीदरम्यान निदर्शनास आले़ या ठिकाणी रात्री ९ वाजतानंतर मुरूमाच्या खोदकामाला सुरुवात केली जात आहे. हे उत्खनन पहाटे ५ वाजेपर्यंत अव्याहतपणे सुरू राहत असल्याची माहिती परिसरातील नागरिक देत आहेत. खोदकाम करण्यात आलेला मुरूम येथून रात्रभरात ट्रक, ट्रॅक्टरने बाहेर ठिकाणी नेला जातो़ हा संपूर्ण प्रकार काही स्थानिक तरुणांनी महसूल विभागातील अधिकाऱ्यांच्या निदर्शनास आणून देत खोदकाम करणाऱ्यावर कारवाई करण्याची मागणी केली़ मात्र, संबंधित अधिकाऱ्यांनी या मागणीकडे लक्ष दिले नसल्याचा आरोप होत आहे. महसूल विभागातील या गौण खनिजाच्या खोदकामाकडे लक्ष देत नसून कुठलीही कारवाई करीत नाही़ आष्टी तालुक्यात तळेगाव, भारसवाडा, अंतोरा, धाडी, बांबर्डा, थार आदी गावशिवारात टेकड्यांची बहूलता आहे. तसेच या टेकड्यांवरील मुरूमही अतिशय चांगल्या दर्जाचा असल्याने परिसरात त्याची मोठी मागणी आहे. हीच बाब हेरून परिसरात गौनखनिज चोरटे सक्रीय झाले असून रात्रीच्या वेळी चक्क जेसीबीच्या सहाय्याने अविधरित्या मुरुमाचे अखंद उत्खनन केले जात आहे. या कारणाने शासनाचा लाखो रुपयांचा महसूल बुडत आहे. तरीही शासन याकडे दुर्लक्ष करीत असल्याने गौण खनिजच्या चोरीला महसूल विभागातील काही अधिकाऱ्यांचा अप्रत्यक्ष आशीर्वाद तर नसावा असा संशय नागरिक व्यक्त करीत आहे. जेसीबीच्या सहाय्याने खोदकाम होत असूनही कारवाई नसल्याने आश्चर्य व्यक्त होत आहे.(वार्ताहर)
गौण खनिजासह चोरट्यांचे रेतीवर लक्ष
By admin | Updated: December 11, 2014 23:11 IST