अयोध्येतील श्रीराम मंदिराच्या उभारणीत ४५ किलो शुद्ध सोन्याचा वापर; किंमत सुमारे ५० कोटी

शेषावतार मंदिरातील सोन्याचे काम अद्यापही सुरू

अयोध्या (उत्तर प्रदेश) : अयोध्येतील श्रीराम मंदिराच्या उभारणीत ४५ किलो शुद्ध सोन्याचा वापर करण्यात आला असून, त्याची किंमत सुमारे ५० कोटी रुपयांपर्यंत आहे. श्रीराम मंदिर निर्माण समितीचे अध्यक्ष नृपेंद्र मिश्रा यांनी शुक्रवारी सांगितले की, मंदिरात एकूण ४५ किलो शुद्ध (२४ कॅरेट) सोन्याचा वापर करण्यात आला आहे. मंदिराची दारे व भगवान श्रीरामांच्या सिंहासनामध्ये मोठ्या प्रमाणावर सोन्याचा वापर करण्यात आला आहे. याबरोबरच शेषावतार मंदिरातील सोन्याचे काम अद्यापही सुरू आहे.

गुरुवारी श्रीराम जन्मभूमी मंदिराच्या पहिल्या मजल्यावर भगवान राम, देवी सीता व भाऊ लक्ष्मण, भरत, शत्रुघ्न व रामभक्त हनुमान यांच्यासह राम दरबाराची संपूर्ण विधिनोक्त रीतीने प्राणप्रतिष्ठा करण्यात आली. त्यांनी सांगितले की, श्रीराम मंदिराच्या मुख्य संरचनेचे निर्माण काम पूर्ण झालेले आहे. परंतु संग्रहालय, सभागृह व अतिथी गृहासह मंदिर परिसरातील अन्य भाग अद्याप निर्माणाधीन आहेत. ही कामे डिसेंबर २०२५पर्यंत पूर्ण होण्याची अपेक्षा आहे. गुरुवारी प्राणप्रतिष्ठेनंतर तेथे लोकांना जाण्याची व्यवस्था केली आहे.

हिरेजडीत मुकुट, सोन्याचा धनुष्य

गुजरातच्या मुकेश पटेल या हिरे व्यावसायिकाने श्रीराम जन्मभूमी तीर्थ क्षेत्र न्यासला ११ मुकुट व सोन्याच्या धनुष्यबाणासह अनेक बहुमूल्य दागिने दान दिले आहेत. १००० कॅरेट हिरे, ३० किलो चांदी, ३०० ग्रॅम सोने व ३०० कॅरेट माणिकपासून हे ११ मुकुट तयार केले आहेत.