आमचं ठरलंय! मीरा भाईंदर मध्ये शिवसेना शाखा उद्घाटनास उद्धवसेना व मनसे एकत्र

ठाकरी बाणाच्या फलकाने वेधले लक्ष

धीरज परब, लोकमत न्यूज नेटवर्क, मीरारोड: शिवसेनाउद्धव ठाकरे गटाचे उद्धव ठाकरे आणि मनसे अध्यक्ष राज ठाकरे यांनी एकत्र येण्याची चर्चा रंगली असताना मीरारोड मध्ये शिवसेना ठाकरे गटाच्या शाखेच्या उदघाटन फलकावर राज यांच्यासह स्थानिक मनसे पदाधिकाऱ्यांची छायाचित्रे असलेला आमचं ठरलंय, ठाकरे बाणा चा फलक लावला गेला. शिवाय ठाकरे गट व मनसेचे प्रमुख पदाधिकारी देखील उद्घटनास एकत्र आले होते.

शहरप्रमुख प्रशांत सावंत यांच्या वतीने काशीमीरा प्रभाग क्रमांक १४ मध्ये शिवसेनेच्या जनसंपर्क कार्यालयाचे उदघाटन आयोजित केले होते. यावेळी शिवसेना नेते राजन विचारे आणि विनोद घोसाळकर यांनी शाखेचे उदघाटन केले. उदघाटन निमित्त शाखेच्या आत तसेच बाहेर देखील शिवसेनेच्या फलकावर उद्धव ठाकरे सह वरिष्ठ नेते व स्थानिक पदाधिकारी यांची छायाचित्रे होतीच पण मनसे प्रमुख राज ठाकरे सह मनसेच्या मीरा भाईंदर मधील प्रमुख पदाधिकाऱ्यांची छायाचित्रे त्यावर होती. फलकावर आमचं ठरलंय.. ठाकरी बाणा महाराष्ट्रासाठी लढणारा, महाराष्ट्रद्रोह्यांना भिडणारा असा मजकूर देखील आहे.

या उदघाटनास १४६ विधानसभा संपर्क प्रमुख नरेश मणेरा,  महिला संपर्क प्रमुख रोशनी कोरे- गायकवाड, जिल्हाप्रमुख प्रभाकर म्हात्रे, महिला जिल्हा संघटक नीलम ढवण, उपजिल्हाप्रमुख धनेश पाटील, उपजिल्हा संघटक सुप्रिया घोसाळकर, प्राची पाटील, माजी जिल्हा संघटक स्नेहल सावंत,  १४६ विधानसभा संपर्क प्रमुख मनोज मयेकर, युवासेना जिल्हाध्यक्ष दीपेश गावंड,  महिला शहर संघटक मनीषा फोफळे, नरेंद्र उपरकर, सुषमा नाईक, उषा उघाडे  आदी ठाकरे गटाचे पदाधिकारी व शिवसैनिक उपस्थित होते. 

मीरा भाईंदर मनसे अध्यक्ष संदीप राणे, महिला शहर अध्यक्ष कविता वायंगणकर, १४६ विधानसभा क्षेत्र अध्यक्ष सचिन पोपळे तर १४५ चे संतोष शिंगाडे, सचिव सचिन साळुंखे, विद्यार्थी सेना अध्यक्ष रॉबर्ट डिसोझा, सचिव प्रकाश शेलार, उप अध्यक्ष लक्ष्मी गाडेकर, करण कांडणगिरे आदी मनसे पदाधिकारी सह मनसैनिक उपस्थित होते. 

यावेळी उद्धव आणि राज ठाकरे बंधूनी एकत्र येऊन बाळासाहेबांची खरी शिवसेना पुन्हा देशाला दाखवून द्यावी. शिवसेना व मनसे संपवण्यासाठी कारस्थाने करणाऱ्या विरोधी राजकीय पक्ष व त्यांच्या नेत्यांना त्यांची जागा दाखवून महाराष्ट्र हित जपावे अश्या भावना शिवसैनिक व मनसैनिकांनी बोलून दाखवल्या.