मुंब्रा बायपासवर उलटलेल्या कंटेनरमुळे ठाण्यात वाहतूक कोंडी!

Traffic jam in Thane : सकाळी कामासाठी निघालेल्या चाकरमान्यांना या कोंडीमुळे नाहक त्रासाला सामोरे जावे लागले.

ठाणे: मुंब्रा बायपास रोडवर उलटलेल्या कंटेनरने ठाणे शहरात वाहतुकीचे तीन - तेरा वाजले. त्यामुळे शहरात वाहतुकीवर परिणाम झाल्याने मुख्य रस्त्यांवर वाहनांच्या लांबच लांब रांगा लागल्या आहेत. सकाळी कामासाठी निघालेल्या चाकरमान्यांना या कोंडीमुळे नाहक त्रासाला सामोरे जावे लागले. रस्त्याच्या मधोमध उमटलेल्या कंटेनर हरवण्यासाठी तीन हायड्रा क्रेनची मदत घेण्यात आल्याची माहिती सूत्रांनी दिली. (Traffic jam in Thane due to overturned container on Mumbra bypass!)

मुंब्रा बायपास रोडवरील हॉटेल लाल किल्ला जवळ बुधवारी मध्यरात्री २.३० वाजण्याच्या सुमारास एक कंटनेर उलटून रस्त्याच्या मधोमध आडवा झाला आहे. सुदैवाने अपघातात कोणीही जखमी झाले नसले तरी या घटनेमुळे मुंब्रा बायपास रोडवर मोठया प्रमाणात वाहतूककोंडी झाली आहे. त्यातून ही कोंडी सकाळी हळूहळू वाढत शहरात कोंडीचे चित्र पाहण्यास मिळून लागले. त्यातच सकाळी कामानिमित्त वाहने घेऊन बाहेर पडलेल्या चाकरमानी या कोंडीत अडकून पडले आहे. मुंब्र्यात रस्त्याच्या मधोमध उमटलेल्या कंटेनर हलविण्यासाठी तीन हायड्रा क्रेनची मदत घेण्यात आली असून त्यानुसार तो कंटेनर हलविण्याचे काम सुरू असल्याची माहिती ठामपा आपत्ती व्यवस्थापन कक्षाचे कक्षप्रमुख संतोष कदम यांनी दिली. 

या घटनेची माहिती मिळताच ठामपा अग्निशमन दल आणि पोलिसांनी धाव घेतली. मात्र, रात्र असल्याने कंटेनर हलवता आले नाही. सकाळ होताच कंटेनर हलविण्याचे काम हाती घेण्यात आले. यामुळे शहरात आणि शहरात येणाऱ्या आणि शहरातून बाहेर जाणाऱ्या रस्त्यांवर वाहतूक कोंडी झाली होती. अपघातामुळे ठाण्याकडून पनवेलच्या दिशेने जाणारी वाहतूक खोळंबली आहे. परिणामी नाशिकहून मुंबई कडे तसेच घोडबंदरहून ठाण्याकडे येणाऱ्या वाहिनीवर वाहतूक कोंडी झाली आहे. काही वेळातच वाहतूक पूर्ववत होईल असे वाहतूक पोलिसांकडून सांगण्यात येत आहे.