ठाणे - अंबरनाथ नगरपरिषदेत मोठा राजकीय ड्रामा पाहायला मिळाला आहे. याठिकाणी सत्ता मिळवण्यासाठी भाजपाने काँग्रेसशी युती केली होती. त्यानंतर काँग्रेसने तिथल्या १२ नगरसेवकांवर निलंबनाची कारवाई केली. त्यानंतर भाजपाने या १२ नगरसेवकांचा स्वतंत्र गट बनवला होता. मात्र सोमवारी याठिकाणी उपनगराध्यक्षपदासाठी निवड प्रक्रिया पार पडणार होती. त्यात भाजपाला मोठा झटका बसला आहे.
कल्याणचे खासदार श्रीकांत शिंदे यांनी केलेल्या खेळीमुळे भाजपाच्या तोंडचा सत्तेचा घास निसटला आहे. या नगरपरिषदेत शिंदेसेनेच्या पाठिंब्यावर राष्ट्रवादीचे सदाशिव पाटील यांची उपनगराध्यक्षपदी निवड झाली आहे. राष्ट्रवादीच्या ४ नगरसेवकांना सोबत घेत शिंदेसेनेने भाजपाचा डाव उलथावून लावला. उपनगराध्यक्ष निवड प्रक्रियेत भाजपाचे प्रतिक पाटील यांना २८ तर शिंदेसेनेचा पाठिंबा मिळाल्याने राष्ट्रवादीचे सदाशिव पाटील ३२ मतांनी उपनगराध्यक्ष म्हणून निवडून आले. या घटनेमुळे भाजपाला मोठा धक्का बसला. त्यानंतर नगरपरिषदेच्या इमारतीत भाजपा आणि शिंदेसेना आमनेसामने आल्याचे दिसून आले. त्यात भाजपा कार्यकर्त्यांकडून शिंदेसेनेविरोधात गद्दार, गद्दार अशी घोषणाबाजी करण्यात आली.
अजित पवारांच्या राष्ट्रवादीचे ४ नगरसेवक अंबरनाथ नगरपरिषदेत आहेत. या चौघांसाठी पक्षाचे नेते अभिजीत करंजुले यांनी व्हिप जारी केला होता. जर कुणी पक्षाच्या भूमिकेविरोधात जात भाजपा उमेदवाराच्या विरोधात मतदान केले तर त्याचे सदस्यत्व रद्द केले जाऊ शकते असा हा व्हिप होता. मात्र शिंदेसेनेने या चौघांच्या पाठिंब्यावर बहुमत मिळवत सदाशिव पाटील यांना उपनगराध्यक्ष बनवले. यामुळे भाजपा आणि शिंदेसेनेत तणाव निर्माण झाला. संपूर्ण निवड प्रक्रिया नियमांविरोधात आहे आणि आम्ही याला कोर्टात आव्हान देऊ असं भाजपाने म्हटलं आहे. ज्या ४ राष्ट्रवादी नगरसेवकांनी शिंदेसेनेची साथ दिली. ते आधी अंबरनाथ विकास आघाडीचा भाग होते. ही तीच आघाडी आहे ज्यात भाजपाचे १४, काँग्रेस १२, राष्ट्रवादी ४, १ अपक्ष आणि नगराध्यक्षासह ३१ सदस्य आहेत. जिल्हाधिकारी कार्यालयात अधिकृतपणे याची नोंद केली होती. मात्र अचानक या आघाडीविरोधात जात राष्ट्रवादीच्या ४ नगरसेवकांनी शिंदेसेनेची साथ घेतली. त्यामुळे नवीन पेच निर्माण झाला आहे.
उपनगराध्यक्ष निवड प्रक्रियेत शिंदेसेनेच्या पाठिंब्याने सदाशिव पाटील यांना ३२ मते पडली तर अंबरनाथ विकास आघाडीकडे २८ मते पडली. या निकालामुळे तणावाचे वातावरण नगरपरिषदेच्या इमारतीत होते. काँग्रेस आणि भाजपा समर्थकांनी चोर मामा, गद्दार मामा असे नारे दिले. श्रीकांत शिंदे जेव्हा याठिकाणी पोहचले तेव्हा भाजपा आणि शिंदेसेनेच्या कार्यकर्त्यांमध्ये घोषणाबाजी झाली. मात्र ऐनवेळी शिंदेसेनेच्या खेळीने भाजपाला झटका बसल्याची चर्चा शहरात जोरदार सुरू झाली.
Web Summary : In Ambernath, Shinde Sena backed NCP's Sadashiv Patil for Deputy Mayor, defeating BJP. This alliance, defying a party whip, caused tension, with BJP alleging procedural violations and planning legal action. The unexpected move sparked protests and accusations of betrayal.
Web Summary : अंबरनाथ में, शिंदे सेना ने एनसीपी के सदाशिव पाटिल को उप महापौर पद के लिए समर्थन दिया, जिससे बीजेपी हार गई। इस गठबंधन ने पार्टी व्हिप की अवहेलना की, जिससे तनाव बढ़ गया, बीजेपी ने प्रक्रियात्मक उल्लंघनों का आरोप लगाया और कानूनी कार्रवाई की योजना बनाई। इस अप्रत्याशित कदम से विरोध और विश्वासघात के आरोप लगे।