अखेर मलंगगडावरील फ्युनिक्युलर ट्रेन सुरू; दोन तासांचा पायी प्रवास आता सात मिनिटांवर 

Malanggad Funicular: या ट्रेनमुळे मलंगगडावर जाण्यासाठी लागणारा 2 तासांचा पायी प्रवास आता अवघ्या 7 मिनिटांवर आला आहे. 

Malanggad Train: मलंगगडावरील बहुप्रतिक्षित फ्युनिक्युलर रेल्वे अखेर सुरू झाली आहे. कित्येक वर्ष रखडून राहिलेल्या या प्रकल्पाला खऱ्या अर्थाने मूर्त स्वरूप आले आहे. गेल्या वर्षभरापासून या सेवेची चाचणी सुरू होती. किसन कथोरे आणि आमदार सुलभा गायकवाड यांच्या उपस्थितीत फ्युनिक्युलर रेल्वेचा शुभारंभ झाला.

या ट्रेनमुळे मलंगगडावर जाण्यासाठी लागणारा 2 तासांचा पायी प्रवास आता अवघ्या 7 मिनिटांवर आला आहे. 

या ट्रेनमुळे मलंगगडावर येणाऱ्या भाविकांच्या संख्येत मोठी वाढ होईल तसेच इथल्या पर्यटनालाही चालना मिळणार आहे. कल्याणजवळचे मलंगगड हे ठाणे जिल्ह्यातील हिंदू-मुस्लिम भाविकांचे प्रसिद्ध धार्मिक स्थळ आहे. 

सह्याद्रीच्या डोंगररांगेत असलेल्या मलंगगडावर जाण्यासाठी भाविकांना 2 तासांची पायपीट करावी लागते. त्यामुळे अनेक भाविकांना इच्छा असतानाही त्या ठिकाणी जाता येत नव्हते. 

अंबरनाथचे तत्कालीन आमदार किसन कथोरे यांनी स्वित्झर्ल्डंच्या धर्तीवर याठिकाणी फ्युनिक्युलर रेल्वेचा प्रस्ताव मंजूर करवून घेतला होता. सार्वजनिक बांधकाम विभागाने सप्तशृंगी वणीगड आणि मलंगगडासाठी फ्युनिक्युलर रेल्वेचा प्रस्ताव मंजूर केल्यांनतर प्रत्यक्ष कामही सुरू झाले होते. 

वणी गडावरील रेल्वेसेवा सुरू झाल्यानंतरही मलंगगडाचा प्रकल्प अनेक दिवस रखडला होता. या डोंगरावरील अवघड वळणावर काम करणे देखील अवघड जात होते त्यामुळे हे काम रखडलेल्या अवस्थेत होते. मात्र बऱ्याच अडथळ्यानंतर अखेर मंलगगडावरील रेल्वेसेवाही सुरू झाली आहे.

मलंगगड ट्रेन मार्गिकेवर 2 ट्रेन धावणार असून एका ट्रेनला दोन प्रशस्त डब्बे आहेत. त्यातून दर तासाला सुमारे 1200 प्रवासी प्रवास करू शकतील. भाविकांचा प्रतिसाद लक्षात घेऊन ही सेवा 24x7 तास देण्याचा प्रयत्न असेल अशी माहिती सुप्रीम सुयोग फ्युनिक्युलर रोपवेज कंपनीच्या व्यवस्थापनाने दिली आहे. या फ्युनिक्युलर ट्रेनसाठी एकूण 70 कर्मचारी तैनात करण्यात आले आहेत.