लोकमत न्यूज नेटवर्क, मीरा रोड :मीरा रोडमध्ये सरस्वती वैद्य (३२) चे तुकडे करणाऱ्या मनोज साने याने त्याच्या नातलगांना सरस्वती ही भाची असल्याचे सांगितले होते. साने याने गुगलवर सर्च करून तिच्या मृतदेहाची विल्हेवाट लावण्यासाठी खरेदी केलेली यांत्रिक करवत बंद पडली असता, ती पुन्हा दुरुस्त करून घेतली होती. तसेच मृतदेहाला दुर्गंधी येऊ नये म्हणून त्याने निलगिरीच्या पाच बाटल्या खरेदी केल्या होत्या, अशाप्रकारे सानेच्या कबुली जबाबातून अनेक नवनवीन खुलासे उघड होत आहेत.
पोलिसांना घरातून सरस्वतीच्या शरीराचे ३० ते ३५ तुकडे सापडले होते. ते तुकडे जेजे रुग्णालयात जुळवण्याचा प्रयत्न केला असता तिच्या पोटाचा, डोक्याचा काही भाग सापडलेला नाही. साने याने तुकडे कुकरमध्ये शिजवले व काही भाजल्याने बहुतांश हाडांवर मांस राहिलेले नाही. साने याने एका पिशवीतून मृतदेहाचे काही तुकडे बाहेर टाकले होते. ते चित्र अत्यंत भयावह होते. मात्र, मृतदेहाचे तुकडे जुळविताना पोलिसांचीही मोठी कसरत होत आहे. सानेने ज्याठिकाणी तुकडे बाहेर टाकले होते त्या ठिकाणचा पोलिस शोध घेणार आहेत. पोलिस साने याच्या जप्त केलेल्या मोबाइलची तपासणी करत आहेत. जेणेकरून पुढील तपास करणे सोपे होईल. साने हा काही महिलांशीही संपर्कात असल्याची माहिती पोलिस सूत्रांनी दिली आहे. सरस्वतीच्या व सानेच्या मोबाइलमधून बऱ्याच गोष्टींचा उलगडा होण्याची दाट शक्यता आहे.
उद्या बहिणींच्या स्वाधीन करणार मृतदेहाचे तुकडे
- पोलिसांनी साने व सरस्वती यांच्या मोबाइल कॉलचे सीडीआर काढण्यास घेतले आहेत, तर साने व सरस्वती भाड्याने राहत असलेल्या गीता नगर फेज ७ मधील गीता आकाशदीप इमारत व परिसरातील सीसीटीव्हीचे फुटेज तपासत आहेत.
- साने हा सरस्वतीला त्रास देत होता. त्याबाबत तिने बहिणीलाही सांगितले हाेते. त्यामुळे बहिणींनी तिला त्यांच्या घरी बाेलावले हाेते, असेही त्यांनी सांगितले होते. सरस्वतीची हत्या झाल्याचे बहिणींना बातम्यांतून समजले.
- सोमवारी सरस्वतीच्या मृतदेहाचे तुकडे हे अंत्यसंस्कारासाठी बहिणींच्या स्वाधीन केले जाणार आहेत. स्वतः आणि सरस्वती अनाथ असल्याचे सांगणाऱ्या साने याच्या बोरिवलीतील बाभई येथे राहणाऱ्या नातलगांकडे नया नगर पोलिसांनी चौकशी केली. त्यात साने याने सरस्वती ही भाची असल्याचे त्यांना सांगितल्याचे उघड झाले होते.
- सरस्वतीला दहावीची परीक्षा द्यायची होती. साने हा तिच्यासोबत आश्रमात जायचा. त्यावेळी साने हा वयाने बराच मोठा असल्याने साने हा आपला मामा असल्याचे सरस्वतीने सर्वांना सांगितले होते.