बीएसएनएलसह (जिओ सोडून) सर्व मोबाईल कंपन्यांनी सहा-सात वर्षांपूर्वी भारतीयांच्या खिशावर मोठा दरोडा टाकला होता आणि करोडो भारतीय ग्राहक बोटे मोडण्यापलिकडे काही करू शकले नव्हते. जिओ येण्यापूर्वी बीएसएनएल असेल की व्होडाफोन की आयडिया किंवा एअरटेल या कंपन्यांनी लाईफटाईम व्हॅलिडिटीच्या नावाखाली हजार-दोन हजार रुपयांची रिचार्ज खपविली होती. तसेच कंपन्यांनी सिमकार्ड विकतानाही लाईफटाईम व्हॅलिडिटी म्हणून सिम विकली होती. परंतू, जिओने फोरजी लाँच केल्यानंतर महिन्याचे रिचार्ज, महिन्याचीच व्हॅलिडीटी काढताच या कंपन्यांनी देखील या लाईफटाईम व्हॅलिडिटीवर दरोडा टाकत महिन्याचे रिचार्ज करा, तेवढेच दिवस नेटवर्क वापरा असा प्रघातच सुरु केला होता. आता तो देखील कालबाह्य होण्याची चिन्हे आहेत.
कारण आता या टेलिकॉम कंपन्या या महिन्याच्या रिचार्जमध्ये दर दिवसाला देत असलेला डेटा आता तासाच्या हिशेबाने देण्यावर विचार करत आहेत. तासाच्या हिशेबाने जिओ आणि एअरटेलने डेटा देण्यास सुरुवात केली आहे. सध्यातरी हा तासाच्या हिशेबाने डेटा प्लॅन असला तरी भविष्यात तो महिन्याच्या इंटरनेट प्लॅनसोबतही जोडला जाण्याची शक्यता आहे. म्हणजेच रिचार्ज महिन्याचे करायचे आणि दर दिवसाला तासाच्या हिशेबाने तुम्हाला डेटा मिळणार.
आतापर्यंत तुम्हाला दिवसाला १ जीबी, दीड, दोन जीबी डेटा मिळत होता. तो तुम्ही दिवसाला कधीही वापरा. पण आता जिओ आणि एअरटेलने ११ रुपयांचा प्रीपेड प्लॅन आणला आहे, त्यात तुम्हाला १० जीबी डेटा मिळणार तो ही केवळ १ तासासाठी. सध्यातरी ही अॅड ऑन ऑफर आहे. पण ती भविष्यात कायमचीच कधी होईल हे देखील तुम्हाला कळणार नाही, त्या लाईफटाईम व्हॅलिडिटीसारखी. जे लोक एखाद्या ठराविक काळासाठी खूप जास्त डेटा वापरतात त्यांच्यासाठी सध्या हा प्लॅन आहे. परंतू, यामुळे देशातील डेटाची किंमत, त्याचा वापर करण्याची पद्धत मात्र बदलणार आहे.
सध्या या ११ रुपयांच्या डेटाचा वापर तुम्ही मोबाईलचे सॉफ्टवेअर अपडेट, आयपीएल सारख्या मॅच पाहणे किंवा एखादी सिरिअल, वेबसिरीज पाहणे डाऊनलोड करणे यासाठी केला जाऊ शकतो.