डोळ्यांत आसवं, मनात आठवणी, नियतीने मांडली 'दुःखाची' प्रश्नपत्रिका; वडिलांचा मृतदेह घरात असतानाही धनश्रीने दिली बोर्डाची परीक्षा!

परीक्षेनंतर घरी पोहोचल्यानंतर तिने वडिलांचे अंतिम दर्शन घेऊन अंत्यसंस्कारात सहभागी झाल्याची हृदयस्पर्शी घटना सोलापुरात घडली.

आप्पासाहेब पाटील -

सोलापूर : आजकाल धकाधकीच्या जीवनात केव्हा काय होईल, हे कुणीच सांगू शकत नाही. घरात वडिलांचे निधन झाले असतानाही त्या परिस्थितीचे दु:ख बाजूला ठेवून दहावीच्या वर्गात शिकत असलेली मुलगी परीक्षा केंद्रात पोहोचली अन् परीक्षा दिली. परीक्षे देऊन घरी पोहोचल्यानंतर तिने वडिलांचे अंतिम दर्शन घेतले आणि अंत्यसंस्कारात सहभागी झाल्याची हृदयस्पर्शी घटना सोलापुरात घडली.

दरम्यान, धनश्री भिकाजी पवार ही शरदचंद्र पवार प्रशालेत दहावी इयत्तेत शिकत होती. तिचा आज शुक्रवारी पुणे बोर्डाचा मराठीचा पहिला पेपर सकाळी दहा वाजता सोलापुरातील भू. म. पुल्ली कन्या प्रशाला केंद्रावर होता. ती परीक्षेला निघण्याच्या तयारीत असताना रुग्णालयात डायलिसेसचे उपचार घेत असलेले तिचे वडील भिकाजी पवार यांचे निधन झाले. अशा दु:खद परिस्थितीत ती परीक्षा देणार नव्हती. मात्र प्रशालेचे मुख्याध्यापक तानाजी माने यांनी तिचे वर्ष वाया जाऊ नये यासाठी तिचे सांत्वन करीत त्यांच्या कुटुंबियांशी संवाद साधून परीक्षा देण्यास प्रवृत्त केले. तिला घरातून परीक्षा केंद्रावर पोहोचविले अन् तिने दु:ख बाजूला ठेवत पहिला मराठीचा पेपर दिला. त्यानंतर तिच्या वडिलांवर अंत्यसंस्कार करण्यात आले.

 केद्रप्रमुख अन् मुख्याध्यापकांची धडपड... -दहावी बोर्ड परीक्षा आयुष्याची दिशा ठरविणारी असते. त्यासाठी धनश्री सज्ज होत होती. भू. म. पुल्ली कन्या प्रशाला केंद्रावर तिच्या स्वप्नांची पहिली पायरी उभी होती. पण नियतीने वेगळीच प्रश्नपत्रिका तिच्यासमोर ठेवली. तिच्या वडिलांचे निधन झाले हे कळताच शरदचंद्र पवार प्रशालेचे मुख्याध्यापक व राज्य मुख्याध्यापक संघ महामंडळाचे अध्यक्ष तानाजी माने तिच्या घरात पोहोचले. घरातून तिला गाडीवर बसवून परीक्षा केंद्रात आणले. तिला पेपर सोडविण्यासाठी केंद्रप्रमुख गीता सादूल यांनी धीर दिला.

शिक्षणधिकारी सचिन जगताप यांची सतर्कता... -धनश्रीच्या घटनेबाबत माध्यामिक शिक्षणाधिकारी सचिन जगताप यांना कळताच ते भू. म. पुल्ली कन्या प्रशालेच्या परीक्षा केंद्रावर तात्काळ हजर झाले. त्यांनी मुलींची विचारपूस करीत तिला परीक्षा देण्यासाठी प्रोत्साहन दिले. संबंधितांना त्या मुलीला परीक्षा देताना कोणत्याही प्रकारची अडचण निर्माण होऊ नये यासाठी सुचना केल्या. त्या मुलीचे शिक्षणाधिकारी यांनी सांत्वन करीत आम्ही तुझ्यासोबत आहोत असं बोलून धीर दिला.