सोलापूर/माढा : माझ्या सोन्या तुम्हाला आता कुठे शोधू ... हे काय झाले... असा आक्रोश करीत गडेकर कुटुंबीयांनी हंबरडा फोडला अन् संजय गडेकर व राहुल गडेकर या बाप-लेकांना एकाचवेळी निरोप दिला. पतीला व एकुलत्या मुलाला निरोप देताना मातेने फोडलेल्या हंबरड्याने अनेकांचे डोळे पाणावले. माढा तालुक्यातील अंजनगाव खेलोबा येथील संजय ज्ञानदेव गडेकर, राहुल संजय गडेकर हे बाप-लेक अनगरजवळ उसाच्या ट्रॅक्टर ट्रॉलीखाली सापडून ठार झाले. संजय गडेकर (४८) व राहुल गडेकर (१७) असे त्या बाप-लेकाचे नाव असून शुक्रवारी सायंकाळी अनगरनजीक एका नर्सरीजवळ हा अपघात झाला.
नव्याने लावलेल्या द्राक्ष बागेच्या संगोपनासाठी शुक्रवार, ७ जानेवारी रोजी सायंकाळी ७.१५ वाजता खते आणायला गेले. ते दोघे अनगरहून अंजनगावकडे दुचाकीवर खते घेऊन निघाले होते. तर ऊस वाहतूक करणारा ट्रॅक्टर हे अंजनगावहून अनगरकडे निघाला होता. इतक्यात या उसाच्या ट्रॅक्टरमागून एक दुचाकी ओव्हरटेक करत आली आणि समोर आलेल्या बापलेकाच्या दुचाकीला धडकली. हा अपघात इतका भीषण होता की दुचाकीच्या धडकेने संजय हे उडून ऊस वाहतूक करणाऱ्या ट्रॅक्टर ट्रॉलीखाली सापडले आणि गंभीर जखमी झाले. इतक्यात बघ्यांनी गर्दी केली आणि काहींनी त्यांना उपचारासाठी हलविले असता संजय यांचा रस्त्यातच मृत्यू झाला. मुलगा राहुल याचा मध्यरात्री उपचारादरम्यान मृत्यू झाला.
चुली, दुकाने बंद ठेवून पाळला दुखवटा
अपघाताची बातमी ही वाऱ्यासारखी गावात पसरली. या अपघाताने अंजनगावावर शोककळा पसरली.
संजय हे मितभाषी आणि गोड स्वभावाचे होते. ग्रामस्थांनी दुकाने बंद ठेवून दुखवटा पाळला. अनेकांनी घराच्या चुली देखील पेटवल्या नाहीत. मयत राहुल अनगर येथे महाविद्यालयीन शिक्षण घेत होता.