अल्पवयीन तरुणीला घरी आणले, तिने छळाला कंटाळून आयुष्य संपवले, मृतदेह अर्धवट शेतात पुरला अन् सगळ्या प्लानचा उलघडा झाला...

पुरावा नष्ट करण्यासाठी मृतदेह शेतात पुरला

कुसळंब : लग्नाचे आमिष दाखवून पुणे येथून पळवून आणलेल्या एका १७ वर्षीय अल्पवयीन प्रेयसीने सासरच्या जाचाला कंटाळून आत्महत्या केली. प्रकरण अंगलट येईल या भीतीने तिला पळवून आणणाऱ्या मुलाने तिचा मृतदेह शेतात पुरला. मात्र मृतदेह अर्धवट अवस्थेत बाहेर आढळला आणि ही बाब पोलिसांपर्यंत गेली. पोलिसांनी तपासाची चक्रे वेगाने फिरवली असता बेपत्ता मुलीने छळाला कंटाळून आत्महत्या केल्याचे प्रकरण बाहेर आले. याप्रकरणी बार्शी तालुका पोलिसांनी प्रियकर आणि त्याच्या आईविरोधात गुन्हा नोंदवला आहे.

आरोपी अभिषेक आश्रुबा बांगर आणि आई सोजरबाई बांगर (दोघे रा. मुंडेवाडी, जि. बीड) या मायलेकांविरोधात आत्महत्येस प्रवृत्त केल्याप्रकरणी गुन्हा दाखल केला आहे. ही धक्कादायक घटना २९ जानेवारी रोजी उघडकीस आली. याप्रकरणी मुलीच्या वडिलांनी फिर्याद दिली आहे.

धक्कादायक! चष्म्यांचा वापर करून मुलींचे व्हिडीओ रेकॉर्डिंग, हॉटेलमधील प्रायव्हेट व्हिडीओ होत आहेत लीक

त्यांनी दिलेल्या फिर्यादीनुसार मुलगी ही शिक्रापूर (पुणे) येथे नातेवाइकांकडे राहत होती. १६ जुलै २०२५ दरम्यान ती बेपत्ता झाली होती. तपासादरम्यान असे समोर आले की, आरोपी अभिषेक आश्रुबा बांगर (रा. मुंडेवाडी, जि. बीड) याने तिला लग्नाचे आमिष दाखवून पळवून नेले होते. त्यानंतर तो तिला बार्शी तालुक्यात तुर्कपिंपरी येथील साखर कारखान्यावर ऊसतोडीच्या कामासाठी घेऊन आला.

१६ जुलै रोजी पळून गेले होते

१६ जुलै २०२५ रोजी झाली होती बेपत्ता कारखान्यावरील खोपीत (झोपडीत) राहू लागले. मुलीला स्वयंपाक येत नाही, ऊसतोडीचे काम जमत नाही, या कारणावरून अभिषेक आणि त्याची आई सोजरबाई यांनी तिचा शारीरिक व मानसिक छळ सुरू केला. या छळाला कंटाळून तिने १३ जानेवारी २०२६ रोजी रात्री ८ ते १४ जानेवारी रोजी पहाटे ४ वाजण्याच्या दरम्यान आडूला गळफास आत्महत्या केली. खोपीतील ओढणीने लावून तिने आत्महत्या केल्याचे लक्षात येताच, पोलिस कारवाईच्या भीतीने आरोपींनी तिचा मृतदेह बैलगाडीत घालून तुर्कपिंपरी साखर कारखान्याजवळील एका शेतात नेला. तेथे खड्डा खणून पुरून टाकला.

पैंजणांवरून ओळख पटली

२९ जानेवारी २०२६ रोजी तुर्कपिंपरी परिसरात एका मुलीचा अर्थवट अवस्थेतील मृतदेह आढळून आला. पोलिसांनी तपास चक्रे फिरवून मुलीच्या वडिलांशी संपर्क साधला. वडिलांनी मुलीच्या पायातील पैंजणांवरून तिची ओळख पटवली. पोलिसांनी संशयित आरोपी अभिषेक याला ताब्यात घेऊन चौकशी केली असता त्याने छळाची आणि मृतदेह पुरल्याची कबुली दिली.

पोलिसांनी मायलेकांविरुद्ध आत्महत्येस प्रवृत्त करणे आणि पुरावा नष्ट करणे या कलमान्वये गुन्हा दाखल केला आहे. पुढील तपास पोलिस उपनिरीक्षक बालाजी वळसणे हे करत आहेत.