वेळाअमावस्येला शेताकडे जाताना अपघात; वडिलाचा जागीच मृत्यू, मुलगी गंभीर जखमी

सोलापूर लोकमत ब्रेकिंग

सांगोला : मालट्रक व स्कुटीची समोरासमोर धडक होऊन झालेल्या अपघातात पित्याचा जागीच मृत्यू तर मुलगी गंभीर जखमी झाल्याने तिच्यावर खासगी रुग्णालयात उपचार सुरू आहेत.  हा अपघात मंगळवार १२ जानेवारी रोजी सायंकाळी पाचच्या सुमारास सांगोला -वाढेगाव रोडवरील माणनदी पुलाजवळ घडला. श्रीपाद दिगंबर कुलकर्णी ( ५२ रा. कडलास रोड, सांगोला महाविद्यालयाजवळ सांगोला) असे मृत पित्याचे नाव असून श्रुती श्रीपाद कुलकर्णी (वय १९) असे जखमी मुलीचे नाव आहे.याबाबत , सांगोला, कडलास रोड येथील श्रीपाद कुलकर्णी हे मंगळवारी सायंकाळी पाचच्या सुमारास एमएच ४५एल ४५४९ या स्कुटीवरून मुलगी श्रुती हिला सोबत घेऊन मेडशिंगी (ता. सांगोला) येथील शेतातील केलेल्या नांगरणीची पाहणी व वेळ अमावस्यानिमित्त निघाले होते, या दरम्यान सोलापूरकडून टीएस ०७ युएफ ९६९० हा मालट्रक वाढेगावमार्गे मिरजकडे निघाला होता, दोन्ही वाहने सांगोला वाढेगाव रोडवरील माणनदी पुलाजवळ आली असता त्यांची समोरासमोर धडक झाल्याने हा अपघात घडला.अपघातातील जखमी श्रीपाद कुलकर्णी व श्रुती कुलकर्णी या दोघांना तात्काळ ग्रामीण रुग्णालयात दाखल केले असता डॉक्टरांनी तपासून श्रीपाद कुलकर्णी मयत झाल्याचे सांगितले. याबाबत रात्री उशिरापर्यंत पोलिसात गुन्हा दाखल करण्याचे काम सुरू होते.