अनेक स्टेज शोजमध्ये तुम्ही लाइव्ह परफॉर्मन्स दरम्यान आतषबाजी पाहिली असेल. स्टेज शो म्हटला की, वेगवेगळ्या अनपेक्षित घटना घडत असतातच. काही दिवसांपूर्वीच एक पोल डान्सर पोलवरून १५ फूट खाली पडली होती. त्यात ती गंभीर जखमीही झाली होती. पण तरी तिने परफॉर्मन्सर पूर्ण केला. अशीच एक स्टेज शोमधील घटना समोर आली आहे. एका स्टेज शोदरम्यान गायक गात होता आणि मागे आतशबाजीमुळे त्याच्या लांब केसांमध्ये आग लागली. पण तरी सुद्धा त्याने गाणं थांबवलं नाही.
सुरूवातीला त्याच्या केसांमध्ये ठिणगी पडली. पण पाहता पाहता आगीने पेट घेतला. पण तो गाण्यात इतका मग्न झाला होता की, त्याच्या केसांना लागलेली आग दुसऱ्या व्यक्तीने येऊ विझवली. गायकाने त्याचा परफॉर्मन्स अजिबात थांबवला नाही. लोआच्या डेट्रोइट रॉक सिटीमध्ये ही घटना घडली. इथे पॉप स्टार बॉबी जेनसन आपल्या बॅन्डसोबत शो करण्यासाठी आला होता.
आतशबाजीमुळे एक ठिणगी बॉबीच्या लांब केसांमध्ये येऊन पडली. त्याच्या गिटार सहकाऱ्याने आग पाहिली आणि तो ती विझवण्याचा प्रयत्न करू लागला. पण आग जास्त असल्याने तो विझवू शकला नाही. नंतर एका दुसऱ्या सहकाऱ्याने कापडाच्या मदतीने आग विझवली. हे सगळं सुरू असताना बॉबी मात्र गाण्यात आणि गिटारमध्ये मग्न होता.
सोशल मीडियात हा व्हिडीओ व्हायरल झाल्यावर गायक बॉबी जेनसनने सांगितले की, 'त्याला नव्हतं माहीत की, त्याच्या केसांमध्ये आग लागली. त्याने कोणताही विग घातला नव्हता. ते माझे खरे केस होते'. तो म्हणाला की, त्याचे केस आता अधिक चांगले झाले आहेत.