गेल्या काही महिन्यांपासून देशात अंबानींच्या लग्नसोहळ्याचीच चर्चा आहे. अनंत अंबानी (Anant Ambani)आणि राधिका मर्चंट (Radhika Merchant) १२ जुलै रोजी लग्नबंधनात अडकले. आधी प्री वेडिंग आणि आता वेडिंग फंक्शन्स असे एकानंतर एक सोहळे सुरुच आहेत. सोशल मीडियावर या लग्नसोहळ्यावर जोरदार टीकाटिप्पणीही होत आहे. इन्स्टाग्राम पाहिलं की फक्त अंबानींचाच सोहळा दिसतोय. अंबानी कुटुंबातील सदस्य स्वत: सुद्धा किती थकले असतील याचा एक व्हिडिओ सध्या व्हायरल होतोय. मुकेश अंबानींची मोठी सून श्लोकाला (Sholka Ambani) झोप अनावर झाल्याचं व्हिडिओतून कळतंय.
१२ जुलै रोजी लग्नसोहळा झाल्यानंतर दुसऱ्या दिवशी आशीर्वाद सोहळ्याचे आयोजन करण्यात आले होते. या सोहळ्याला पंतप्रधान नरेंद्र मोदींनी हजेरी लावली होती. त्यांनी नवदाम्पत्याला आशीर्वाद दिले. अंबानी कुटुंबातील सर्वांची भेट घेतली. या सोहळ्याच्या एका व्हिडिओने मात्र नेटकऱ्यांचं लक्ष वेधून घेतलं. व्हिडिओत नरेंद्र मोदींच्या बाजूला मुकेश अंबानींचा मोठा मुलगा आकाश अंबानी आहे. तर त्याच्या बाजूला पत्नी श्लोका अंबानी आहे. समोर कार्यक्रम सुरु असतानाच श्लोका अंबानीला झोप अनावर झालेली दिसत आहे. बघता बघता ती चक्क पेंगताना दिसते. हे सर्व कॅमेऱ्यात कैद झालं असून सोशल मीडियावर व्हिडिओ तुफान व्हायरल होतोय.
या व्हिडिओवर नेटकऱ्यांनी कमेंट करत श्लोकाची बाजू घेतली आहे. 'तिला दोन मुलं असून ती इतकं सगळं मॅनेज करते हे कौतुकास्पद आहे','ती नक्कीच वर्षभर सुरु असणाऱ्या या सोहळ्यामुळे थकली असेल','हे नॉर्मल आहे, ती दोन मुलांची आई आहे तरी घडाळ्याच्या काट्यावर चालत ती सर्व मॅनेज करत आहे. ' अशा कमेंट्स नेटकऱ्यांनी केल्या आहेत.