Video : कुत्र्यांना फिरवत असतानाच त्याच्यावर अचानक कोसळली वीज अन्...

सोशल मीडियावर एक व्हिडीओ वेगाने व्हायरल होत आहे. हा धक्कादाय व्हिडीओ पाहून तुम्ही नक्कीच हैराण व्हाल. एक व्यक्ती आपल्या कुत्र्यांना फिरवण्यासाठी बाहेर घेऊन गेला होता. त्यावेळी अचानक त्याच्यावर वीज पडली. आजूबाजूच्या लोकांनी प्रसंगावधान राखून लगेच त्याला वैद्यकिय मदत दिली. त्यामुळे त्याचा जीव वाचला. 

ही धक्कादायक घटना एलेक्स कोरीस नावाच्या एका व्यक्तीसोबत घडली. 3 ऑक्टोबर रोजी टेक्सासमधील स्टुब्नर एअरलाइन पशुचिकित्सक रूग्णालयाजवळ कोरीसवर वीज कोसळली. ही वीज एलेक्सच्या बुटांवर पडली होती.  

घटना घडल्यानंतर CCTV फोटेज व्हायरल होत आहे. CCTV फोटेजमध्ये तुम्ही पाहू शकता की, कोरीस रस्त्यावरून जात असतानाच अचानक आकाशात वीज कडाडते आणि ती थेट त्याच्या पायावर येऊन कोसळते. कोरीससोबत असलेले कुत्रे घाबरून पळून जातात तर तो तोंडावर पडतो. रस्त्यावर पडताच एलेक्स बेशुद्ध होतो. त्यानंतर जवळच असलेली लोक प्रसंगावधान राखत कोरीसला सीपीआर देऊन त्वरित रूग्णालयात दाखल केलं. 

ABC News ने दिलेल्या वृत्तानुसार, कोरीस सध्या हॉस्पिटलमध्ये असून त्याची प्रकृती स्थिर आहे. घटना घडल्यानंतर काही वेळातच कोरीसच्या कुत्र्यांनाही शोधण्यात आलं. दरम्यान या घटनेचा धक्कादायक व्हिडीओ इंटरनेटवर व्हायरल होत असून इन्साइड एडिशनने आपल्या यूट्यूब चॅनेलवरून अपलोड केला आहे.