Accident Viral Video : भरधाव कारचाअपघात होऊन आग लागल्याचे अनेक व्हिडिओ सोशल मीडियावर व्हायरल होतात. असाच एक व्हिडिओ सध्या मोठ्या प्रमाणात व्हायरल होत आहे. या व्हिडिओत काही लोक कारमध्ये अडकलेल्या व्यक्तीचा जीव वाचवताना दिसत आहेत. यावेळी संपूर्ण कार आगीच्या विळख्यात आलेली दिसत आहे. कार चालकाला वेळीच वाचवले नसते, तर त्याचा होरपळून मृत्यू झाला असता.
मीडिया रिपोर्टनुसार, अमेरिकेतील मिनेसोटा राज्यातील सेंट पॉल येथे गुरुवारी(दि.18) सायंकाळी साडेसहा वाजता ही घटना घडली. व्हायरल व्हिडिओमध्ये तुम्ही बघू शकता की, एका कारचा हायवेवर अपघात झालेला दिसत आहे. अपघातामुळे कार आगीच्या विळख्यात येते. यावेळी काही लोक कारकडे धावतात आणि कारचा दरवाजा उघडण्याचा प्रयत्न करतात. एकजण कारची काच फोडून कार चालकाला बाहेर काढण्याचा प्रयत्न करताना दिसतोय. अनेक प्रयत्न करुनही कारचा दरवाजा उघडत नाही. अखेर कारच्या खिडकीची काच फोडून अडकलेल्या व्यक्तीला बाहेर काढले.
लोकांनी तत्परता दाखवून गाडीत अडकलेल्या व्यक्तीला वेळीच वाचवले. हा व्हिडिओ पाहिल्यानंतर सोशल मीडिया यूजर्स लोकांचे कौतुक करत आहेत. या प्रकरणाची माहिती देताना स्थानिक पोलिसांनी सांगितले की, या घटनेत कोणतीही जीवितहानी झाली नाही. पण, या घटनेत कार पूर्णपणे जळून खाक झाली. या घटनेचा व्हिडिओ सोशल मीडिया प्लॅटफॉर्म इन्स्टाग्रामवर goodnews_movement नावाच्या अकाऊंटवरून शेअर करण्यात आला आहे.