"मशाल चिन्ह दिसलं की निधी कमी करून टाकतो", मंत्री नितेश राणे यांचे ठाकरेंना डिवचणारे विधान

Nitesh Rane Uddhav Thackeray: कॅबिनेट मंत्री नितेश राणे यांनी पुन्हा एकदा राजकीय वादंग निर्माण होईल असे विधान केले आहे. ठाकरेंना डिवचताना आपण उद्धवसेनेच्या सरपंचांचा निधी कमी करतो, असे म्हटले आहे. 

जिल्हा परिषद आणि पंचायत समिती निवडणुकीची रणधुमाळी सुरू आहे. याच प्रचारादरम्यान कॅबिनेट मंत्री नितेश राणे यांनी एक विधान केले. "कमळ किंवा धनुष्यबाण चिन्ह दिसले की, लगेच निधी देतो. पण, चुकून मशाल चिन्ह निघाले की, असलेला निधीही कमी करून टाकतो", असे नितेश राणे म्हणाले आहेत. कणकवलीमधील फोंडा जिल्हा परिषद मतदारसंघात प्रचार करताना त्यांनी हे विधान केले. 

जिल्हा परिषद निवडणुकीसाठी झालेल्या प्रचारसभेत बोलताना नितेश राणे म्हणाले, "चिन्ह बघून निधी देतो. कमळ आणि धनुष्यबाण आमची चिन्हे आहेत. ग्रामपंचायत निवडणुकीतही सगळ्या सरपंचांना सांगितले होते की, आम्हाला ग्रामपंचायत द्या, नाहीतर एक रुपयाचाही निधी मिळणार नाही. त्यामुळे सगळे सरपंच पटापट आमचे झाले."

"लोकांनाच प्रश्न पडलाय, विरोधकांना मतदान करायचं का?"

नितेश राणे म्हणाले, "विरोधी उमेदवारांना मतदान का करायचं? असा प्रश्न लोकांना पडला आहे. ही निवडणूक खासदार नारायण राणे यांच्या नेतृत्वाखाली लढवत आहोत. गेली २७ वर्षे जिल्हा परिषद त्यांच्या नेतृत्वाखाली आहे आणि पुढील पाच वर्षेही राहील. जिल्ह्याचा विकास खासदार नारायण राणे आणि महायुतीच करू शकते", असा दावा नितेश राणे यांनी केला.   "उबाठाची आम्हाला कोणतीही चिंता नाही. जे काही उमेदवार उरले आहेत, ते प्रचार करताना दिसत नाहीत. काही तर लपत फिरत आहेत. निवडणुकीनंतर पुन्हा निधीसाठी आमच्याकडेच यावे लागणार आहे", नितेश राणे यांनी म्हटले आहे. 

"फोंडा मतदारसंघात निधी कमी पडू देणार नाही. मला या मतदारसंघात नंबर वन लीड द्या. पहिला एक कोटी रुपयांचा निधी देतो", अशी घोषणा नितेश राणेंनी आचारसंहिता लागलेली असताना केली आहे. त्यामुळे विरोधकांकडून या घोषणेबद्दल काय भूमिका घेतली जाणार, हेही महत्त्वाचे ठरणार आहे.