मोती तलावात हॉटेल उभारण्याचा डाव कुणाचा होता?  लखमसावंत यांचा सवाल, दीपक केसरकर आणि राजघराणं आमने सामने

Sawantwadi Nagar Parishad Election: वीस वर्षापूर्वी केसरकर हे एका बड्या हाॅटेल व्यावसायिकाला तलावात हॉटेल उभारण्याचा प्रस्ताव घेऊन राजवाड्यात आले होते असा मोठा गौप्यस्फोट केला असून त्यामुळेच राजघराणे न्यायालयात गेले असल्याचा दावा लखमसावंत यांनी पत्रकार परिषदेतून केला आहे.

सावंतवाडी - मल्टीस्पेशालिटी हॉस्पिटल व मोती तलावाची मालकी यावरून सावंतवाडी चे राजकारण तापले असून आमदार दीपक केसरकर यांनी केलेल्या टिकेला भाजप युवा मोर्चा उपाध्यक्ष लखमसावंत भोसले यांनी जोरदार प्रत्युत्तर देत वीस वर्षापूर्वी केसरकर हे एका बड्या हाॅटेल व्यावसायिकाला तलावात हॉटेल उभारण्याचा प्रस्ताव घेऊन राजवाड्यात आले होते असा मोठा गौप्यस्फोट केला असून त्यामुळेच राजघराणे न्यायालयात गेले असल्याचा दावा लखमसावंत यांनी पत्रकार परिषदेतून केला आहे.तसेच मल्टीस्पेशालिटी हॉस्पिटल बाबत गैरसमज पसरविण्याचे काम सुरू असल्याचा दावा हि त्यांनी यावेळी केला आहे.

ते शुक्रवारी सावंतवाडीत बोलत होते.यावेळी लखमसावंत यांनी आमदार दीपक केसरकर संजू परब यांनी केलेल्या टिकेला जोरदार प्रत्युत्तर दिले.राजघराणे हे जनतेच्या सेवेसाठी आहे.आमचा दरवाजा कधीही बंद नसतो फक्त आमची वेगवेगळ्या पध्दतीने बदनामी करण्याचे काम सुरू आहे.पण जनतेला सर्व काहि माहिती आहे.मल्टीस्पेशालिटी हॉस्पिटल साठी  तब्बल दोन एकर जागा राजघराण्याने फुकट दिली आहे. यापूर्वी सुद्धा अनेक जागा आम्ही दिल्या आहेत. त्यामुळे निवडणुकीच्या तोंडावर राजघराण्याला कोणी बदनाम करण्याचा प्रयत्न करू नका सावंतवाडीच्या विकासासाठी राजघराणे नेहमीच जनतेसोबत राहिले आहे व यापुढेही राहील. मल्टीस्पेशालिटी हॉस्पिटल बाबतचा सामंजस्य करार हा शासनाकडून करण्यात आला होता आमच्याकडून नाही. त्यामुळे त्यात आम्ही अटी शर्ती घालण्याचा प्रश्नच येत नाही. त्या करारावर आम्ही एकदा नाही तर दोन वेळा सह्या केल्या आहेत.

उर्वरित सही घेण्याची जबाबदारी ही शासनाची आहे. त्यासाठी दोन एकर जागा आम्ही मोफत दिली आहे.असे असताना केवळ निवडणुकीच्या तोंडावर जनतेला चुकीची माहिती देणे योग्य नाही. स्वतःच्या निवडणुकीत त्या कराराचा फायदा करून घेतला गेला व आता गैरसमज पसरवला जात आहे. राजकारणासाठी त्याचा वापर कोण करत आहे, असा सवाल  लखमराजे भोंसले यांनी केला.

सावंतवाडीचं सौंदर्य हा ऐतिहासिक मोती तलाव आहे. त्यामुळे हे सौंदर्य जपण्यासाठी व त्याचे संवर्धन करण्यासाठी राजघराण्याने नेहमीच प्रयत्न केले आहेत व शेवटपर्यंत करीत राहू. मोती तलावामध्ये कोणत्याही चुकीच्या गोष्टी करू देणार नाही आणि करणारही नाही. ह्याच मोती तलावात कन्स्ट्रक्शन उभारलं जाणार व मोठी तलाव जनतेसाठी राहणार नाही असे म्हणणाऱ्यांनी २००३ मध्ये मोती तलावात हॉटेल उभारण्यासाठी प्रस्ताव कोणी आणला होता हे जाहीर करावं, असं आव्हान देखील लखमसावंत यांनी केले.

मोती तलावाचे सुशोभीकरण तसेच ज्या पर्यटनाच्या दृष्टीने व लोकांच्या दृष्टीने चांगल्या गोष्टी होत होत्या त्याला आम्ही कधीही विरोध केला नाही. उदाहरण द्यायचं झालं तर मोठी तलावातील संगीत कारंजा तसेच बोटिंग प्रकल्प याला आम्ही कधीही विरोध केला नाही. मात्र ऐतिहासिक मोती तलावाचे काँक्रिटीकरण होऊ नये व त्याचा ऐतिहासिकपणा राखला जावा हा आमचा हेतू राहिला आहे, असेही त्यांनी यावेळी स्पष्ट केले.