ट्रकला धडकून एक ठार शिरगाव धोपटेवाडी येथील घटना

मृत मोटरसायकलस्वार भोमचा

 शिरगांव : देवगड-नांदगाव मार्गावर शिरगांव धोपटेवाडी येथे ट्रकला पाठीमागून मोटारसायकलची धडक बसून झालेल्या अपघातात वैभववाडी तालुक्यातील भोम येथील आनंद हरिश्चंद्र सावंत (वय ४०) यांचे निधन झाले. तर मोटारसायकल चालक जखमी झाला. ही घटना आज, शुक्रवारी सकाळी ११ वाजण्याच्या दरम्यान घडली. वैभववाडी तालुक्यातील भोम येथील आनंद सावंत व नामदेव जाधव हे यामाहा वायबीआर क्र. (एमएच ०७, यु- ३७९७) घेऊन देवगडला जात होते. नामदेव जाधव हे मोटारसायकल चालवत होते. नांदगाव-देवगड याच मार्गावर चिरे भरण्यासाठी चिरेखाणीवर ट्रक जात असताना नामदेव जाधव यांच्यापुढे असलेल्या ट्रकच्या चालकाने अचानक ब्रेक लावल्याने नामदेव जाधव यांना त्यांची मोटारसायकलचा वेग आवरता न आल्याने ट्रकला पाठीमागून धडक दिली. या धडकेने मोटारसायकलच्या पाठीमागे बसलेले आनंद सावंत हे रस्त्यावर फेकले गेले. त्यांच्या तोंडाला व डोक्याला गंभीर दुखापत झाल्याने रूग्णवाहिकेतून कणकवली येथे उपचारासाठी नेण्यात आले. तेथे त्यांचे निधन झाले. अपघात झाल्यानंतर ट्रकचालक थांबला नाही. त्यामुळे तो ट्रक कोणाच्या मालकीचा होता हे समजू शकले नाही. अपघातात मोटारसायकलच्या दर्शनी भागाचे नुकसान झाले आहे. आनंद सावंत हे गवंडी कामगार होते. त्यांच्या पश्चात पत्नी, तीन मुले, आई-वडील असा परिवार आहे. भोम येथे त्यांच्या निधनाचे वृत्त समजताच शोककळा पसरली. अपघातस्थळाचा शिरगांव पोलीस दूरक्षेत्राचे दूरक्षेत्र अंमलदार सहायक पोलीस उपनिरीक्षक दीपक वरवडेकर, भूषण सुतार यांनी पंचनामा केला. (प्रतिनिधी)