मालवणमध्ये लाटांच्या तालावर डॉल्फिनचा रास; ७५ जलराण्यांचा चिवला बीचवर अद्भुत सोहळा

सागरी जीव संशोधक डॉ. विशाल भावे आणि त्यांच्या चमूने ‘सरगॅसम’ समुद्री शैवाल प्रकल्पाचे सर्वेक्षण करत असताना, हा अद्भुत नजारा ड्रोन कॅमेऱ्यात कैद केला.

संदीप बोडवे

मालवण (जि.सिंधुदुर्ग) : सिंधुदुर्गच्या अथांग दर्याची जैवविविधता किती श्रीमंत आहे, याचा प्रत्यय पुन्हा एकदा मालवणच्या चिवला बीचवर आला आहे. समुद्रामध्ये चक्क ७५ हून अधिक ‘इंडियन ओशन हम्पबॅक डॉल्फिन्स’चा एक विशाल समूह एकाच वेळी बागडताना दिसून आला. लाटांच्या तालावर ताल धरत, अधूनमधून पाण्यातून उंच झेप घेणाऱ्या या जलराण्यांचा ‘रास’ पाहून निसर्गप्रेमी आणि संशोधक भारावून गेले आहेत.

सागरी जीव संशोधक डॉ. विशाल भावे आणि त्यांच्या चमूने ‘सरगॅसम’ समुद्री शैवाल प्रकल्पाचे सर्वेक्षण करत असताना, हा अद्भुत नजारा ड्रोन कॅमेऱ्यात कैद केला.

ड्रोनमुळे उलगडले अचूक संख्याबळ

मालवणच्या किनाऱ्यावर डॉल्फिनचे दर्शन नेहमीच घडते, पण ७५ चा आकडा थक्क करणारा आहे. सुरुवातीला काही मोजकेच डॉल्फिन असावेत असे वाटत होते.

मात्र, ड्रोनने उंचीवरून पाहिल्यानंतर तीन उप-गटांमध्ये विभागलेला हा भलामोठा ताफा स्पष्टपणे दिसून आला. यामुळे या प्रजातीच्या वर्तणुकीचा नवा पैलू समोर आला आहे.

‘सरगॅसम’ प्रकल्पात गवसला खजिना

‘मॅन्ग्रोव्ह अँड मरिन बायोडायव्हर्सिटी फाउंडेशन’च्या सहकार्याने समुद्रकिनाऱ्यालगतच्या तपकिरी शैवाळाचा (सरगॅसम) अभ्यास सुरू आहे. या सर्वेक्षणादरम्यान डॉल्फिनचा हा ‘महाकळप’ आढळला. कोकणच्या समृद्ध सागरी अन्नसाखळीवर पुन्हा शिक्कामोर्तब झाले आहे.

एकाच वेळी एवढ्या मोठ्या संख्येने डॉल्फिन्स दिसणे, हे या भागातील सागरी अन्नसाखळी आणि पाण्याची गुणवत्ता उत्तम असल्याचे निदर्शक आहे. ड्रोन तंत्रज्ञानामुळे आम्हाला या समूहाचा नेमका आकार आणि हालचालींचे अचूक निरीक्षण करता आले.  डॉ. विशाल भावे, सागरी संशोधक, सृष्टी कन्झर्व्हेशन फाउंडेशन.

डॉल्फिनचा इतका मोठा समूह एकत्र दिसण्याची ही घटना दुर्मीळ मानली जात असून, सोशल मीडियावर या दृश्यांची चर्चा सुरू आहे.