पेट्री : कास मार्गावर यवतेश्वर घाटात बहुतांशी ठिकाणी संरक्षक कठड्यांची दुरवस्था, तर काही ठिकाणी मोठ्या प्रमाणावर संरक्षक कठडे ढासळले आहेत. सव्वा महिन्यापूर्वी वळवाच्या मुसळधार पावसामुळे साधारण पंचवीस ते तीस फूट लांबीपर्यंतचा संरक्षक कठडा ढासळला होता. माॅन्सूनला सुरुवात झाली तरी अद्याप येथे कोणत्याही प्रकारची दुरुस्ती झाली नाही. यामुळे घाटातील वाहतूक ऐन पावसाळ्यात धोकादायक बनत चालली असून, वाहनचालकांतून तीव्र नाराजी व्यक्त होत आहे.
कास, बामणोली जिल्ह्यातील पर्यटनस्थळे असल्याने परिसरात फिरण्यासाठी साताऱ्याहून यवतेश्वर घाटमार्गे जावे लागते. येथून वर्षभर वाहतूक सुरू असते. खासगी वाहने, अवजड मालवाहतूक, महाविद्यालयीन तरुण, शाळकरी मुले, नोकरदारवर्गाची सतत रहदारी असते. शनिवार, रविवार,उन्हाळी सुटीत तसेच जोडून सुटी आल्यास मोठ्या प्रमाणावर यामार्गे वाहतूक होत असते. सध्या कोरोनाच्या पार्श्वभूमीवर अत्यावश्यक सेवेतील वाहनचालकांचा या मार्गाने प्रवास होत असून, पावसाळ्यात एकीकडे कोसळणारी दरड तर दुसरीकडे दुरवस्थेत असलेले संरक्षक कठडे अशा बिकट परिस्थितीत दाट धुक्यातून वाहनचालकांना जीव मुठीत धरून प्रवास करावा लागत आहे. माॅन्सूनला सुरुवात झाली असली तरी पावसाची उघडीप आहे, तोपर्यंत घाटातील दुरुस्तीची कामे तत्काळ होण्याची मागणी वाहनचालकांतून होत आहे.
साधारण दहा ते बारा ठिकाणी ढासळलेले कठडे व नादुरुस्त कठड्यांची दुरुस्ती जैसे थे आहे. तसेच पॉवर हाऊसपासून काहीच अंतरावर भला मोठा संरक्षक कठड्याचा भाग पायासहित सव्वा महिन्यांपूर्वी ढासळल्यामुळे दिवसा तसेच रात्रीच्या वेळी वाहतुकीच्या सुरक्षिततेच्या दृष्टीने रस्त्याच्या दुतर्फा रिफ्लेक्टर, सूचनाफलक, कठड्याची दुुरुस्ती व नवीन बांधकामाची मागणी वाहनचालकांतून जोर धरत आहे.
(चौकट)
तत्काळ उपाययोजनेची मागणी
दाट धुके, मुसळधार पाऊस त्यात एकीकडे कोसळणारी दरड व दुसरीकडे ढासळलेले कठडे यामुळे कोणतीही विपरीत घटना घडण्याअगोदर संबंधित विभागाने तत्काळ उपाययोजना करण्याची मागणी वाहनचालक, स्थानिकांतून होत आहे.
१४पेट्री
फोटो : सव्वा महिन्यापूर्वी मोठ्या प्रमाणावर ढासळलेल्या कठड्याची अद्याप कोणतीही दुरुस्ती नाही. (छाया : सागर चव्हाण)