पेट्री : सातारा-कास मार्गावरील यवतेश्वर घाटात दरड पडण्याचे प्रकार सुरूच आहेत. गुरुवारी आणि शुक्रवारी तीन ते चार ठिकाणी मुसळधार पावसाने रस्त्यालगत मोठ्या प्रमाणावर दरडी कोसळल्या. ही दरडी रस्त्यालगत तसेच पाणी वाहून नेणाऱ्या चरीमध्ये कोसळल्या असल्याने वाहतुकीस कोणताही अडसर निर्माण झाला नाही. वाहतूक सुरळीत सुरू आहे. परंतु बऱ्याच ठिकाणी पाणी वाहून नेणाऱ्या चरीवर दरडी कोसळून या चरी मुजल्याने रस्त्यावर पाणी, माती, बारीक दगड काही प्रमाणात आले आहेत. जेसीबीद्वारे चरी मोकळ्या करण्याचे काम सुरू आहे.
शहराच्या पश्चिमेकडील परिसरात पडत असणाऱ्या सततच्या मुसळधार पावसाने यवतेश्वर घाटात गुरुवारी तीन ठिकाणी तसेच शुक्रवारी एका ठिकाणी लहान मोठ्या स्वरूपात मुरूम, माती, दगड अशा दरडी रस्त्यालगतच्या चरीत पडल्याने चरी मुजल्या होत्या. पाण्यासोबत रस्त्यावर मुरूम, माती येऊन वाहनचालकांना कोणताही अडसर निर्माण होऊ नये यासाठी मुसळधार पावसात चरीत व रस्त्यालगत पडलेली दरड हटविण्याचे काम सुरू आहे.
दरवर्षी या घाटात दरडी कोसळण्याचे प्रमाण वारंवार व मोठ्या प्रमाणावर घडत असते. परंतु यंदा घाटातील बहुतांशी रस्ता रूंदीकरण केल्याने कोसळलेल्या दरडी रस्त्यावर आल्या नाहीत. बहुतांशी ठिकाणी पाणी वाहून नेणाऱ्या मार्गदर्शक भिंती बांधल्यामुळे रस्त्यावर मुरूम माती न येण्यास मदत झाली. ज्या ठिकाणी चरी मुजल्या त्या ठिकाणची माती, पाणी, बारीक दगड काही प्रमाणात रस्त्यावर आली.
चौकट
गेल्या तीन-चार दिवसांपासून घाट परिसरात मुसळधार पाऊस पडत असल्याने दरडी कोसळत आहेत. घाटात डोंगरालगत असुरक्षित ठिकाणी उभे राहून काही पर्यटक फोटोसेशन करतानाचे चित्र दिसत आहे. त्यामुळे हे धोकादायक ठरून दरड कोसळून जीवावर बेतू शकते.
फोटो
१८यवतेश्वर घाट
सातारा-कास मार्गावरील यवतेश्वर घाटात शुक्रवारीही काही ठिकाणी दगड माती रस्त्यावर पडली होती. त्यामुळे दुचाकी वाहने चालविणे अवघड झाले होते. (छाया : सागर चव्हाण)