मायणी : मल्हारपेठ- पंढरपूर राज्यमार्गावर मायणीपासून सहा किलोमीटर अंतरावर असलेल्या देशमुखवस्ती (विखळे) येथील चारचाकी व दुचाकीचा समोरासमोर अपघात होऊन दोनजण जागीच ठार झाले, तर अन्य चारजण जखमी झाले. मृतांमध्ये एक मायणीतील तर दुसरा लातूर येथील आहे. सूरज राजाराम माळी, संतोष किसनराव बिराजदार अशी ठार झालेल्यांची नावे आहेत.
घटनास्थळ व पोलिसांकडून मिळालेली माहिती अशी की, लातूर जिल्ह्यातील सय्यदपूर, ता. देवणी येथील बिराजदार कुटुंब शनिवारी कोल्हापूर येथे देवदर्शनासाठी गेले होते. देवदर्शन करून रविवारी सकाळी अकरा वाजता कोल्हापूरहून सय्यदपूर या ठिकाणी निघालेले होते. ते रविवारी सायंकाळी चारच्या सुमारास मायणीजवळील विखळे हद्दीत आले.
विखळे येथील देशमुख वस्तीजवळ मोटारसायकलवरील (एमएच ११ सीएफ ८५१९) सूरज राजाराम माळी (वय २७, रा. मायणी, मानमोडी, ता. खटाव) तर चारचाकी (एमएच १४ जीयू ६७९८) यांच्यात जोरदार अपघात झाला. यामध्ये सूरज माळी व संतोष किसनराव बिराजदार (४०, रा. सय्यदपूर ता. देवणी. जि. लातूर) यांचा जागीच मृत्यू झाला, तर राजकुमार बिराजदार (२५), ज्योतीराम धनाजी बिराजदार (३५), दत्ता बिराजदार (३२), महेश विठ्ठल झोळकुडे (२४, सर्व राहणार सय्यदपूर, ता. देवणी) हे जखमी झाले. त्यांना मायणी येथील प्राथमिक आरोग्य केंद्रामध्ये प्राथमिक उपचार करून सातारा जिल्हा रुग्णालयात नेण्यात आले आहे.
हा अपघात इतका भयानक होता, की चारचाकी दुचाकीला धडकून रस्त्याकडेच्या छोट्या ओढ्यावरील कठड्याला जाऊन धडकली. चालक महेश विठ्ठल झोळकुडे (२४) यांच्यावर गुन्हा दाखल करण्यात आला आहे. सहायक पोलीस निरीक्षक शहाजी गोसावी तपास करत आहेत.