पाचगणी : आंब्रळ (ता. महाबळेश्वर) येथील युवकाने पहाटे घराच्या समोरच असणाऱ्या गुलमोहराच्या झाडाला गळफास घेऊन आत्महत्या केली. मात्र, या आत्महत्येचं कारण मात्र समजू शकले नाही.
प्रतीक विलास जाधव (वय २३) असे आत्महत्या केलेल्या युवकाचे नाव आहे.
याबाबतची पोलीस स्टेशन व घटनास्थळावरून मिळालेली माहिती अशी की, आत्महत्येपूर्वी प्रतीकने गुड नाईटचे अखेरचा स्टेटस ठेवून पहाटेच्या सुमारास घराच्या समोरच असणाऱ्या गुलमोहराच्या झाडाला गळफास घेऊन आत्महत्या केली. हे सकाळी त्याच्या आजोबांच्या निदर्शनास आले. प्रतीकच्या वडिलांनी तीन वर्षांपूर्वी आत्महत्या केली तर आईचेही निधन झाले आहे. प्रतीक आजी-आजोबांजवळ राहत होता. प्रतीकला मोठा भाऊ असून, तो नोकरीनिमित्त पुण्याला असतो. तर प्रतीकने दोन वर्षांपूर्वी त्याचे पदवीपर्यंतचे शिक्षण पूर्ण केले आहे. सध्या तो प्लम्बिंगचे काम करीत होता. आत्महत्या करण्यापूर्वी त्याने घरातून बाहेर येत दरवाजाला बाहेरून कडी लावून सर्वजण झोपेत असताना आत्महत्या केल्याचा प्राथमिक अंदाज व्यक्त होत आहे. पाचगणी पोलीस ठाण्यात या घटनेची नोंद झाली असून, पाचगणी पोलीस ठाण्याचे सहायक पोलीस निरीक्षक सतीश पवार व त्यांचे सहकारी अधिक तपास करीत आहेत.