उंडाळेतील दादासाहेब उंडाळकर विद्यालयाच्या आवारात बगीचा असून, याठिकाणी फुलपाखरे आढळून येतात. एरव्ही सर्वत्र दिसणाऱ्या फुलपाखरांपेक्षा दोन दिवसांपूर्वी एक वेगळे फुलपाखरू संजय पाटील यांना बागेत दिसून आले. त्यांनी याबाबतची माहिती विद्यालयात दिल्यानंतर शिक्षकांसह विद्यार्थ्यांनीही त्याठिकाणी गर्दी केली.
फुलपाखराविषयी माहिती देताना अभ्यासक माने म्हणाले, ॲटलास मॉथ हे आशिया खंडातील जंगलात आढळणारे मोठे पतंग आहे. त्याचे पंख २४ सेंटिमीटरपर्यंत असतात आणि पंखांच्या पृष्ठभागाचे क्षेत्रफळ सुमारे १६० सेंटिमीटरपर्यंत असते. मादी झाडांच्या पानाखाली २.५ एमएम आकाराची गोलाकार अंडी देते. या फुलपाखराचे आयुष्य एक ते दोन आठवड्यांचे असते. मादी अंडी दिल्यानंतर मरते. दोन आठवड्यानंतर हिरव्या रंगाचे सुरवंट जन्म घेतात आणि लिंबू, पेरू, दालचिनी यासारख्या सदाहरित झाडांवर अन्न खातात. सुरुवातीला अंड्यांचे कवच हे त्यांचे अन्न असते. त्यानंतर हे पाने व रेशीमपासून बनवलेल्या कोषामध्ये जातात. कोषामधून चार आठवड्यानंतर पतंग बाहेर पडतात. ऊर्जा वाचविण्यासाठी ते रात्री संचार करतात आणि दिवसा आराम करतात.
यावेळी प्राचार्य बी. आर. पाटील, हरितसेना समन्वयक जगन्नाथ माळी यांच्यासह शिक्षक उपस्थित होते.
फोटो : ०७केआरडी०१
कॅप्शन : उंडाळे (ता. कऱ्हाड) येथील स्वातंत्र्यसैनिक दादासाहेब उंडाळकर विद्यालयात दुर्मिळ फुलपाखरू आढळले.