Satara: मुलांचं गप्प राहणं हाच गुण ‘त्यानं’ हेरला; शाळेत पहाटेच्या अंधारात अश्लील कृत्य, केअरटेकरच्या विकृत कारनाम्याने पालक हादरले

सर्वाधिक सहावीतील मुलांवर ‘त्याची’ नजर

सातारा : सातारा शहरातील एका नामांकित शाळेतील तब्बल २४ मुलांचा मानसिक व लैंगिक छळ करणाऱ्या विकृत केअरटेकरचे कारनामे ऐकून पालक अक्षरश: हादरून गेले आहेत. या केअरटेकरने हे अश्लील व धमकीचे सारे कारनामे पहाटेच्या अंधारात केले. जी मुले शांत व गप्प राहत होती. अशी मुले हेरून तो आपला सावज करायचा.केअरटेकरने छळ केलेली सर्वाधिक मुले ही सहावी इयत्तेतली आहेत. काही मुले सातवी आणि नववीतील सुद्धा आहेत. ही सर्व मुले वर्षभरापासून केअरटेकरच्या अश्लील हरकती गप्प गुमान सहन करत होती. याची वाच्यता केली तर आपल्याला शाळेतून काढून टाकले जाईल, याची भीती मुलांना वाटायची. त्यामुळे कोणीही तक्रारीसाठी पुढे आले नाही; परंतु एका मुलाने धाडस करून आपल्या वडिलांना संबंधित केअरटेकरच्या घृणास्पद कृत्याविषयी भीतभीत सांगितले. तेव्हा एवढ्या मोठ्या प्रतिष्ठित शाळेत असा प्रकार घडतोय, याचा पालकांना सुरुवातीला विश्वास बसला नाही. परंतु तो मुलगा जेव्हा रडत रडत सांगू लागला तेव्हा पालकांनी तातडीने मुलाला विश्वासात घेऊन धीर दिला. तत्काळ संबंधित शाळेच्या प्राचार्यांना याची कल्पना दिली. अत्यंत गोपनीय पद्धतीने पोलिस व शाळा व्यवस्थापनाने चाैकशी केल्यानंतर केअरटेकरच्या कृत्याला २४ मुले बळी पडल्याचे समोर आले. या प्रत्येक मुलाला वेगवेगळ्या प्रकारे त्याच्याकडून त्रास सुरू होता. आता या प्रकारामुळे इतर मुलांचे पालक धास्तावले आहेत. आपला मुलगा त्या शाळेत सुरक्षित राहील का, याची चिंता अनेक पालकांना लागली आहे.

‘तो’ २६ वर्षांचा अविवाहित तरुण!संबंधित केअरटेकर २६ वर्षांचा असून, तो अविवाहित आहे. गेल्या चार वर्षांपासून तो त्या शाळेत काम करत आहे. पूर्वी त्याची गुन्हेगारी पार्श्वभूमी होती का, याची माहिती आता पोलिसांकडून घेतली जात आहे. या प्रकारामुळे संबंधित केअरटेकरला तातडीने नोकरीवरून शाळा प्रशासनाने काढून टाकल्याचे पोलिस सांगताहेत.