कोरेगावात हॉटेल व्यावसायिकास मारहाण; जातिवाचक शिवीगाळ

कोरेगाव : शहरातील मुख्य रस्त्यावर असलेल्या हॉटेल आण्णा चायनीजमधील विद्युत दिव्याचा प्रकाश बंगल्यावर पडत असल्याच्या कारणावरून चिडून जाऊन बर्गे कुटुंबातील सहा जणांनी मारहाण करून जातिवाचक शिवीगाळ केली. तसेच तलवारीचा धाक दाखविला. यावेळी झालेल्या झटापटीत सोन्याची चेन व ४० हजार रुपयांची रोकड गहाळ झाल्याची तक्रार हॉटेल व्यावसायिक सुरेश पोपट बोबडे यांनी कोरेगाव पोलीस ठाण्यात दिली आहे. याप्रकरणी सहा जणांविरुद्ध गुन्हा दाखल करण्यात आला आहे.

पोलिसांनी सांगितले की, हुतात्मा स्मारकानजीक सुरेश बोबडे यांचे आण्णा चायनीज नावाचे हॉटेल आहे. तेथे असलेल्या विद्युत दिव्यांचा प्रकाश हा समोर वास्तव्यास असलेल्या प्रकाश बर्गे यांच्या बंगल्यावर पडत आहे. त्यावरून प्रकाश बर्गे, प्रीतम बर्गे व अनिकेत बर्गे व त्यांच्या पत्नींनी जातिवाचक शिवीगाळ करत मारहाण केली. त्याचबरोबर प्रकाश बर्गे यांनी तलवारीचा धाक दाखविला. यावेळी झालेल्या झटापटीत सोन्याची चेन व ४० हजार रुपयांची रोकड गहाळ झाल्याचे बोबडे यांनी आपल्या तक्रारीत म्हटले आहे. याप्रकरणी कोरेगाव पोलीस ठाण्यात मारहाण व जातिवाचक शिवीगाळ केल्याचा गुन्हा नोंद करण्यात आला आहे. पोलीस उपअधीक्षक गणेश किंद्रे तपास करत आहेत.