सातारा जिल्ह्यात कोरोनाचा शिरकाव; दोन रुग्ण स्पष्ट, एक व्हेंटिलेटरवर

जिल्ह्यात २०२० मध्ये कोरोनाचा प्रथम शिरकाव झाला. त्यानंतर दोन वर्षे कोरोनाने दोन लाखांहून अधिकजण बाधित झाले होते. तसेच अनेकांचा मृत्यूही झालेला.

नितीन काळेल 

सातारा : जिल्ह्यात अडीच वर्षानंतर कोरोना रुग्ण आढळून आले आहेत. गुरूवारी दोन रुग्ण निष्पन्न झाले असून त्यांच्यावर जिल्हा रुग्णालय आणि कऱ्हाडमधील एका रुग्णालयात उपचार सुरू आहेत. तर यातील एकाला व्हेंटिलेटरवर ठेवण्यात आले आहे, अशी माहिती आरोग्य विभागाच्यावतीने देण्यात आली.

जिल्ह्यात २०२० मध्ये कोरोनाचा प्रथम शिरकाव झाला. त्यानंतर दोन वर्षे कोरोनाने दोन लाखांहून अधिकजण बाधित झाले होते. तसेच अनेकांचा मृत्यूही झालेला. मात्र, २०२२ च्या उत्तरार्धापासून कोरोना रुग्ण सापडणे थांबले होते. पण, अडीच वर्षानंतर पुन्हा कोरोनाचे रुग्ण आढळून येऊ लागले आहेत. सध्या दोन रुग्ण निष्पन्न झाले आहेत.

एकावर सातारा येथील दिवंगत क्रांतिसिंह नाना पाटील जिल्हा शासकीय रुग्णालयात उपचार सुरू आहेत. तर दुसऱ्या व्यक्तीवर कऱ्हाडमधील खासगी रुग्णालयात उपचार केले जात आहेत. दरम्यान, कोरोनाच्या पार्श्वभूमीवर जिल्हा रुग्णालयात एक स्वतंत्र वाॅर्ड तयार करण्यात आलेला आहे.