लोकमत न्यूज नेटवर्क
सांगली : शहरातील बायपास रोडजवळ असलेल्या मल्टिप्लेक्सजवळून जाणाऱ्यास चाकूने धाकाने लुटणाऱ्या दोघांना स्थानिक गुन्हे अन्वेषण शाखेच्या पथकाने अटक केली. सागर धनाजी लोखंडे (वय २१, रा.संपत चौक, सांगली) व शशिकांत जगन्नाथ कांबळे (२८, रा.चिंतामणीनगर झोपडपट्टी, सांगली) अशी संशयितांची नावे असून, त्यांच्याकडून १४ हजार १०० रुपयांचा मुद्देमाल जप्त करण्यात आला आहे.
बुधवार, दि. १८ रोजी हमालीचा व्यवसाय करणारे बाळू पांडुरंग लेंगरे (रा.कर्नाळ रोड, सांगली) हे सायंकाळी सातच्या सुमारास जात असताना, त्यांना चाकूच्या धाकाने लुटण्यात आले होते. पोलीस या संशयितांच्या मागावर होते. यावेळी एलसीबी पथकातील संतोष गळवे व संदीप पाटील यांना माहिती मिळाली की, संशयित हे आरटीओ ऑफिस कमानीजवळ स्वस्त दरात मोबाइल विक्रीचा प्रयत्न करत आहेत. त्यानुसार, पथकाने दोघांना ताब्यात घेतले. यावेळी त्यांनी सांगितले की, आठवड्यापूर्वी मल्टिप्लेक्सजवळ एकास अडवून त्याच्याकडील रोख रक्कम व माेबाइल काढून घेतली होती. त्यानुसार, संशयिताकडून १४ हजार रुपये किमतीचा मोबाइल व चाकू असा मुद्देमाल जप्त करण्यात आला.
पोलीस निरीक्षक सर्जेराव गायकवाड यांच्या मार्गदर्शनाखाली संकेत मगदूम, अनिल कोळेकर, हेमंत ओमासे आदींच्या पथकाने ही कारवाई केली.