दहा हजार गुंतवणूकदार; ५५० कोटींचा गोरखधंदा

श्रीनिवास नागे ।
लोकमत न्यूज नेटवर्क
सांगली : ‘महारयत’कडून साडेपाचशे कोटींची टोपी घालून घेणारे आठ-दहा हजार हतबल गुंतवणूकदार, खाद्य-लसींअभावी तडफडणाऱ्या कडकनाथ कोंबड्या, नासलेली-पुरून टाकली जात असलेली अंडी... हे चित्र एकीकडे, तर आपण कसे अडकणार नाही याची तजवीज करण्यात व्यस्त असलेले नेते, भांडणारी दोन-चार डोकी, सोयीस्कर मौन घेऊन निवडणुकीच्या तयारीला लागलेले लोकप्रतिनिधी... हे चित्र दुसरीकडे. या पार्श्वभूमीवर ‘कडकनाथ’चा शेवट काय-कसा होणार, गुंतवणूकदारांना पैसा परत मिळणार की नाही, हे प्रश्न अनुत्तरितच राहत आहेत.
कडकनाथ कोंबड्यांच्या कोणत्याच शेडवर दोन-तीन महिन्यांपासून खाद्य नाही. परिणामी कोंबड्या एकमेकींना टोचा मारत किलकिलाट करत असलेल्या दिसतात. खाद्य-लसीअभावी मर होऊ लागल्याने शेड ओकीबोकी पडत आहेत. उठाव नसल्याने वास मारत पडलेली चार-चार हजार अंडी पुरून टाकली जात आहेत.
‘महारयत’साठी लोकांना भुलवणारे, स्वत:ची हमी देणारे युवा नेते आता नामानिराळे झाले आहेत. ‘कडकनाथ’मध्ये आपण कसे अडकणार नाही याची तजवीज करण्यात ते, त्यांचे तारणहार मायबाप व्यस्त आहेत. हा गोरखधंदा समजत असूनही या नेतेमंडळींनी सुधीर आणि संदीप मोहितेची पाठराखण केली. मार्केटिंग करणाºया टीमला ‘मोटिव्हेशनल लेक्चर्स’ देण्यापासून, लोकांना गुंतवणूक करण्यास भाग पाडण्यापर्यंत काही युवा नेते जातीने लक्ष देत होते. स्वत: शब्द टाकत होते म्हणे! त्यांचा आणि गंडा घालणाऱ्यांचा धंदा परस्परपूरक. गंडा घालणाºयांना यांचं वलय-बॅकिंग मिळायचं, तर यांना मानसन्मान आणि अप्रत्यक्ष वाटा...
नाना उद्योग करणाºया सुधीर मोहितेने आध्यात्मिक प्रवचनेही दिली आहेत! तो आणि संदीप दोघेही गोड बोलण्यात पटाईत. पोल्ट्री शेड भाड्याने घेण्याच्या धंद्यातून दोघांची गणेश शेवाळेशी मैत्री झाली आणि दोघे शेतकरी संघटनेतील नेत्यांच्या संपर्कात आले. याच संघटनेच्या इस्लामपुरातील युवा नेत्याशी ऊठबस वाढली. यातून संदीप संघटनेचा पदाधिकारी झाला. ‘रयत अ‍ॅग्रो’ची संकल्पना तेव्हाचीच. संघटनेचे आणि कंपनीचे नाव एकच. हा निव्वळ योगायोग बरे! रयत अ‍ॅग्रोची महारयत अ‍ॅग्रो बनलेल्या कंपनीच्या पुणे, औरंगाबादसह इतर कार्यालयांच्या उद्घाटनाला या युवा नेत्यांची उपस्थिती होती. त्यांचे नेहमीच रयत आणि महारयतच्या कार्यालयांमध्ये येणेजाणे होते. पैसे भरण्यासाठी-करार करण्यासाठी आलेल्यांना ते आणखी पैसे गुंतवण्यास सांगत. त्यावर स्वत:ची हमी देत! विशेष म्हणजे त्यांच्या कार्यकर्त्यांनी, पै-पाहुण्यांनीही ‘कडकनाथ’वर पैसा लावला. ‘महारयत’मध्ये सर्वाधिक गुंतवणूक कुणाची असेत, तर ती हातकणंगले लोकसभा मतदारसंघाची!
आता याविरोधात लढा उभा राहतोय. नागवलेल्या शेतकºयांच्या बाजूने काहीजण नेटाने उभे आहेत. ‘कडकनाथ’मध्ये बड्या नेत्यांचा हात असल्याचे दिसू लागल्याने काहींची गोची झाली आहे. मूग गिळून ते गप्प आहेत! तर काही ‘चाणक्य’ सोयीस्कर मौन घेऊन निवडणुकीच्या तयारीला लागले आहेत. त्यांना हातमिळवणी करायची असावी... ‘कडकनाथ’चा शेवट काय-कसा होणार, गुंतवणूकदारांना पैसा परत मिळणार की नाही, हे प्रश्न मात्र अनुत्तरितच राहत आहेत.

‘महारयत’चे लागेबांधे आणि काही प्रश्न...
फर्डे बोलणे, छाप पाडणारे व्यक्तिमत्व पाहूनच बड्या नेत्यांनी संदीप मोहितेला त्यांच्या संघटनेच्या युवा आघाडीचा जिल्हाध्यक्ष केले. त्याची ऊठबस त्यांच्यातच असायची. मग त्याच्यासोबत फिरणाºयांना त्याचे उद्योग माहीत नव्हते काय?
युवा नेत्यांची संघटनेतील लाखो-हजारो कार्यकर्त्यांसारखी सुधीर-संदीप मोहितेसोबत नुसतीच ओळख नव्हती, तर कमालीची घसट होती. मोहितेंच्या घरगुती कार्यक्रमांना जातीने हजेरी, त्यांच्यासोबत कुटुंबासह पर्यटनाचा आनंद, ‘महारयत’च्या कार्यालयांचे स्वहस्ते उद्घाटन, त्या कार्यालयांतील नेहमीचा वावर या युवा नेत्यांना ‘क्लीन चिट’ देईल काय?
गुंतवणूकदार पैसे देत असताना, करार करत असताना तेथे असलेली युवा नेत्यांची उपस्थिती, पैसे गुंतवण्यास भाग पाडण्यासाठी त्यांनी केलेले प्रयत्न म्हणजे या गोरखधंद्यातील त्यांचा वाटा अधोरेखित करत नाही का?
बक्कळ धंदा करणाºया एजंट, डिलरना परदेशी दौरे, बक्षिसे देण्याचा फंडा विविध कंपन्या अवलंबत असतात. ‘महारयत’नेही काहींना परदेशी दौरा घडवून आणला. त्यात हे नेतेही सहभागी झाले नव्हते काय?