सांगलीतील लाच प्रकरणी आयएएस अधिकारी शुभम गुप्तांच्या अडचणी वाढल्या; आणखी कारनामे उघडकीस

सांगलीत २४ मजली इमारतीचा बांधकाम परवाना मंजूर करण्यासाठी ७ लाखांची लाच मागितल्याबद्दल महापालिकेचे उपायुक्त वैभव साबळे यांना लाचलुचपत विभागाने अटक केली. या प्रकरणात आता आयएएस अधिकारी शुभम गुप्ता यांचे नावही समोर आले आहे.

काही दिवसापूर्वी सांगलीत ७ लाख रुपयांची लाच मागितल्या प्रकरणी महापालिकेचे उपायुक्त वैभव विजय साबळे याला लाचलुचपत प्रतिबंधक विभागाने अटक केली. या प्रकरणाची राज्यभर चर्चा झाली. आता या लाच प्रकरणात प्रकरणात तत्कालीन आएएस अधिकारी शुभम गुप्तांचे नाव पुढे येत आहे. या प्रकरणी त्यांनाही सहआरोपी करण्याची मागणी सुरू झाली आहे. या प्रकरणामुळे प्रशासकीय अधिकाऱ्यांच्या कारभारावर प्रश्न उपस्थित केले जात आहेत. 

Air India च्या विमानाला बॉम्बने उडवण्याची धमकी; 156 प्रवाशांचा जीव टांगणीला

आयएएस अधिकारी शुभम गुप्ता यांचे अनेक नवीन कारनामे आता समोर आले आहेत. यामुळे गुप्ता यांच्या अडचणीत वाढ झाली आहे. याआधी शुभम गुप्ता गडचिरोली येथे सेवेत होते. यावेळी त्यांच्यावर भ्रष्टाचाराचा आरोप झाला होता. यानंतर त्यांची बदली सांगली येथे झाली. गुप्ता प्रशिक्षणार्थी असताना आदिवासी विभागात कार्यरत होते. या विभागाच्या अंतर्गत आदिवासींसाठी गायी म्हशी वाटपाची एक योजना राबवण्यात आली. या योजनेत प्रकल्प अधिकारी म्हणून त्यांनी भ्रष्टाचार करून आदिवासींच्या पैशांचा मोठा अपहार केल्याचा आरोप त्यांच्यावर आहे. 

सांगलीत बदलीनंतर नवीन कारनामे

शुभम गुप्ता यांनी सांगलीत पदभार स्विकारल्यानंतर काही दिवसातच त्यांनी अनेक वादग्रस्त प्रकरण हाताळली. यावेळी सांगलीतील खासदार विशाल पाटील आणि आमदार सुधीर गाडगीळ यांनी प्रश्न उपस्थित केले होते. यावेळी गुप्ता यांची सांगलीमधून तडकाफडकी बदली झाली होती, महापालिका क्षेत्रातील आरक्षित जागा संपदानाचा जो विषय आहे त्याबाबतीत सुद्धा आयुक्त गुप्ता यांच्यावर प्रचंड मोठ्या प्रमाणात आरोप झाले आहेत. त्यांनी भूमी संपादनाबाबत कोट्यवधी रुपये संशयास्पद रित्या मूळ मालकाला न देता वट मुक्तानंदरांना पैसे देऊन त्यात भ्रष्टाचार झाल्याचा आरोप होत आहे.  

२०० ते २५० कोटींच्या ठेवी खासगी बँकेत ठेवल्या

सांगलीतील लाच प्रकरणी आम्ही सामाजिक कार्यकर्ते सतीश साखळकर यांची प्रतिक्रिया घेतली. यावेळी सतीश साखळकर म्हणाले," महापालिकेच्या आर्थिक ठेवी होत्या त्या नॅशनल बँकेत होत्या. पण , गुप्ता सांगलीत रुजू  झाल्यानंतर जवळ जवळ २०० ते २५० कोटी रुपयांच्या ठेवी या प्रायव्हेट बँकेत ठेवल्या. गुप्ता यांनी महापालिकेच्या आपत्कालीन फंडातून स्वत:साठी गाडी खरेदी केली होती. सांगलीत आल्यापासून त्यांनी भ्रष्टाचाराला सुरुवात केली होती. ते कोणाचेच ऐकत नव्हते, त्यांचा कारभार मनमानी होता,  मक्तेदारांचे चेक काढण्यासाठी १५ ते १७ टक्के पर्यंत टक्केवारी घेऊन ठेकेदारांचे चेक काढत होते, असा आरोपही सतीश साखळकर यांनी केला.    

लाच प्रकरणात सहआरोपी करण्याची मागणी

दरम्यान, २४ मजली इमारतीच्या परवानगीसाठी ७ लाख रुपयांची लाट मागितल्या प्रकरणी वैभव साबळे यांना अटक केली. आता तक्रारादार तानाजी रूईकर यांनी आयएएस अधिकारी शुभम गुप्ता यांच्यावर आरोप केले. गुप्ता यांना सहआरोपी करण्याची मागणी केली. तक्रारादार तानाजी रूईकर म्हणाले, शुभम गुप्ता यांना आम्ही वारंवार परमिशनची फाईल पूर्ण करुन द्या म्हणून सांगत होतो. आम्हाला तो प्रोजेक्ट लवकरात लवकर चालू करायचा होता. त्या प्रोजेक्टमधून महापालिकेला २ कोटी रुपये शासनाची फि म्हणून भरावी लागणार होती. असं असताना देखील शुभम गुप्ता यांनी वारंवार तुटपुंज्या कारणासाठी फाईल खाली पाठवण्याचा प्रयत्न केला, पैसे मागण्याच्या हेतूने त्यांनी फाईल मागे दिले. यामुळे या प्रकरणात त्यांनाही सहआरोपी करण्याची मागणी केली, असंही ते म्हणाले.