कडेपुरात भाजपच्या वर्चस्वाला कॉँग्रेसचे आव्हान

जिल्हा परिषद निवडणूक : संग्रामसिंहांसाठी लाल दिव्याच्या आशा पल्लवित, राष्ट्रवादीही ताकद अजमावणार

प्रताप महाडिक --कडेगाव  कडेगाव तालुक्यातील कडेपूर जिल्हा परिषद गट भाजपचा बालेकिल्ला असून, येथे भाजपचे जिल्हाध्यक्ष माजी आमदार पृथ्वीराज देशमुख यांचे निर्विवाद वर्चस्व आहे. मात्र कॉँग्रेसचे नेते माजी मंत्री आमदार डॉ. पतंगराव कदम यांच्या नेतृत्वाखाली कॉँग्रेसने येथे झुंज देण्याचा निर्धार केला आहे. भाजपच्या वर्चस्वाला आव्हान देण्यासाठी कॉँग्रेसच्या इच्छुकांनी दंड थोपटले आहेत. दरम्यान, राष्ट्रवादी कॉँग्रेसही येथे ताकद अजमावणार असल्याचे समजते. कडेपूर जिल्हा परिषद गट खुला झाल्याने अध्यक्षपद खुले असल्याने जिल्हा मध्यवर्ती बॅँकेचे उपाध्यक्ष आणि माजी आ. संपतराव देशमुख यांचे पुत्र संग्रामसिंह देशमुख यांना लाल दिव्याची संधी चालून आली आहे. जिल्हा परिषदेत भाजपचे बहुमत झाले, तर निश्चितपणे लाल दिव्याच्या शर्यतीत उतरतील, अशी आशा आहे. यामुळे येथे भाजपकडून संग्रामसिंह यांची उमेदवारी निश्चित मानली जाते. या गटात कॉँग्रेसकडूनही भाजपला टक्कर देण्याची जोरदार तयारी सुरू आहे. कडेपूर येथील ज्येष्ठ नेते, सह्याद्री सहकारी साखर कारखान्याचे माजी उपाध्यक्ष बबनराव ऊर्फ भाऊसाहेब यादव देशमुख यांचे पुतणे सत्यजित ऊर्फ बंडूभैया यादव-देशमुख किंवा अमरापूर येथील सुनील पाटील यांना कॉँग्रेसकडून उमेदवारी मिळेल अशी जोरदार चर्चा आहे. दरम्यान, भाजपचे जिल्हाध्यक्ष माजी आमदार पृथ्वीराज देशमुख तसेच भाजप नेतृत्वाने संधी दिल्यास कडेपूर येथील नेताजीराव यादव हे भाजपकडून उमेदवारी करण्यास इच्छुक आहेत. तशी इच्छा त्यांनी पृथ्वीराज देशमुख यांच्याकडे व्यक्त केली आहे. या गटात राष्ट्रवादी कॉँग्रेसकडून उमेदवारांची चाचपणी सुरू आहे. येथे पक्षादेश आला तर युवक राष्ट्रवादी कॉँग्रेसचे तालुकाध्यक्ष शकील मुल्ला निवडणूक लढविण्यास तयार आहेत. कडेपूर पंचायत समिती गण हा सर्वसाधारण महिलेसाठी राखीव आहे. येथे भाजपचे वर्चस्व असल्याने येथे भाजपमध्ये इच्छुकांची संख्या जास्त आहे. या गणातून हणमंतवडिये येथील माधवी संग्राम मोरे, सोहोली येथील भाजप नेते आणि कडेगाव तालुका भाजप अध्यक्ष हिम्मत देशमुख यांच्या पत्नी मनीषा देश्मुख, कडेपूर येथील माजी पंचायत समिती सदस्या मनीषा हिंदुराव यादव, हणमंत वडीये येथील अलका मोहन मोरे, चिखली येथील रंजना रवींद्र शिंदे तसेच अर्चना जयवंत शिंदे आदी महिला उमेदवार भाजपकडून उमेदवारी करण्यास इच्छुक आहेत. कडेपूर पंचायत समिती गणात अमरापूरचे सरपंच सुभाष मोरे यांच्या पत्नी संगीता मोरे या काँगे्रसकडून इच्छुक आहेत. दरम्यान, उमेदवारी मिळो अगर न मिळो, भाजप पक्षाचे काम ताकदीने करणार असल्याचे सर्व भाजपच्या इच्छुक उमेदवारांनी सांगितले. हिंगणगाव बु्रदुक पंचायत समिती गण खुला आहे. या गणातही भाजपचे वर्चस्व असले तरी, येथे अटीतटीच्या लढतीची परंपरा आहे. या गणात भाजपकडून उपाळे मायणी येथील उपसरपंच प्रा. आशिष ऊर्फ योगेश जयसिंग घार्गे, शंकर सुभेदार घार्गे यांच्यासह तोंडोली येथील शंकरराव मोहिते, भिकवडीचे ज्येष्ठ नेते युवराज सावंत, उफाळे मायणी येथील संग्राम घारगे आदी इच्छुक आहेत. हिंगणगाव बुद्रुक गणातून कॉँग्रेसकडून दिग्गज उमेदवार देण्याची जोरदार तयारी सुरू आहे. या गणातून तोंडोलीचे सरपंच विजय मोहिते, सागरेश्वर सहकारी सूतगिरणीचे उपाध्यक्ष महेश कदम यांनी कॉँग्रेस उमेदवारीसाठी डॉ. पतंगराव कदम यांच्याकडे फिल्डिंग लावली आहे. कडेपूर जिल्हा परिषद गट, पंचायत समिती गण आणि हिंगणगाव ब्रुद्रुक पंचायत समिती गणातील लढती कशा होणार आणि कोण बाजी मारणार, याकडे सर्वांचे लक्ष लागले आहे.