Sangli: ढगात भरकटलेले अजितदादांचे हेलिकॉप्टर…अन् नियतीने वाचवलेला क्षण; तो थरारक प्रसंग आज पुन्हा आठवणींतून समोर आला

कडेगाव (जि. सांगली) : काळ कधी कुणासाठी काय घेऊन येईल, हे सांगता येत नाही. १५ जून २०१५ रोजी सकाळी घडलेला एक थरारक प्रसंग आज पुन्हा आठवणींतून समोर आला; पण यावेळी तो प्रसंग दिलासा देणारा नसून, हृदय पिळवटून टाकणारा ठरला आहे. अजित पवार हे त्या दिवशी औंध (ता. खटाव) येथून हेलिकॉप्टरने कराडकडे रवाना झाले होते. विधानसभेचे पावसाळी अधिवेशन सुरू असल्याने त्यांना मुंबईला तातडीने पोहोचणे आवश्यक होते. मात्र, सुरली घाट परिसरात पोहोचताच अचानक दाट ढगाळ हवामान निर्माण झाले. क्षणात दृश्यता कमी झाली आणि हेलिकॉप्टर दिशाभूल होऊन भरकटले. तो क्षण जीवघेणा ठरू शकला असता; परंतु पायलटने दाखवलेल्या विलक्षण प्रसंगावधानामुळे मोठा अनर्थ टळला. परिस्थितीचा अचूक अंदाज घेत हेलिकॉप्टर कडेगाव एमआयडीसी परिसराकडे वळवले आणि सागरेश्वर सूतगिरणीचे अध्यक्ष शांताराम कदम यांच्या दत्त टेक्सटाइलच्या मोकळ्या मैदानावर ते सुरक्षितपणे उतरवले. मात्र, अजित पवार यांचा प्रवास थांबणे शक्य नव्हते. त्यांच्या स्वीय सहायक नितीन काटकर आणि अंगरक्षक पाटील यांनी तातडीने जवळील विद्याश्री टेक्सटाइलमध्ये धाव घेतली. तेथे कारमधून त्यांना कराड विमानतळावर सुरक्षितपणे पोहोचवले. पुढे मुंबईत पोहोचल्यानंतर अजित पवार यांनीही हा प्रसंग अनेकांना सांगितला होता. “ढगात भरकटलेले हेलिकॉप्टर आणि थोडक्यात टळलेला धोका” हा किस्सा त्यांच्या आयुष्यातील महत्त्वाच्या आठवणींपैकी एक ठरला होता. त्या दिवसाची आठवण कडेगाव तालुका आणि परिसरातील नागरिकांच्या मनात पुन्हा जिवंत झाली.