राज्यात एसटीचे ६१ लाख प्रवासी घटले, मात्र सांगली विभागात ४ लाख वाढले

प्रसाद माळी

सांगली : राज्यात ऑक्टोबरमध्ये राज्य मार्ग परिवहन महामंडळाचे ६१ लाख प्रवासी घटल्याने एसटीला मोठ्या तोट्यास सामोरे जावे लागले. मात्र, सांगली विभागाने दिवाळीमध्ये केलेल्या सुयोग्य नियोजनामुळे ऑक्टोबरमध्ये ४ लाख ८३ हजार प्रवासी वाढले. राज्यात एसटी पीछाडीवर असली, तरी सांगली विभागाने मात्र प्रवाशांची मने जिंकत त्यांची संख्या वाढवण्यात आघाडी घेतली आहे.

यंदाच्या ऑक्टोबरमध्ये सांगली विभागाने विविध कल्पक गोष्टी राबवत आणि नियोजनावर भर देत गर्दीच्या मार्गावर वाहने वाढवली. शटल सेवांच्या फेऱ्यांमध्ये वाढ केली. ग्रामीण वाहतुकीवर भर दिला. प्रवाशांची गैरसुविधा टाळली, याचे फळ त्यांना मिळाले असून, विभागाला अधिक फायदा मिळविण्यात यश आले आहे. सांगली विभागीय कार्यालयातील विभाग नियंत्रक सुनील भोकरे, विभागीय वाहतूक अधिकारी (प्र.) सतीश पाटील, सहायक वाहतूक अधीक्षक (चालान) प्रवीण डोंगरे यांच्या मार्गदर्शनाखाली विविध आगारांतील आगारप्रमुख, वाहतूक निरीक्षकांनी प्रयत्नपूर्वक विभागासाठी सामूहिक यश प्राप्त केले.

गतवर्षीच्या तुलनेत विविधस्तरावर वाढ

स्तर / ऑक्टोबर २०२४ / ऑक्टोबर २०२५ / यंदाची वाढ
उत्पन्न / २० कोटी ७६ लाख ४८ हजार / २५ कोटी २ लाख २७ हजार / ४ कोटी २५ लाख ७९ हजार
प्रवासी संख्या / ८४ लाख ९७ हजार / ८९ लाख ८० हजार / ४ लाख ८३ हजार
किलोमीटर / ७३ लाख ५४ हजार / ७७ लाख ३२ हजार / ३ लाख ७८ हजार

गर्दीच्या मार्गावर कार्यरत फेऱ्यांमध्ये अधिकची वाढ
मार्ग / फेऱ्या
सांगली - कोल्हापूर / ८
सांगली - इचलकरंजी / १२
मिरज - कोल्हापूर / ४
मिरज - इचलकरंजी / ६
ईश्वरपूर - कोल्हापूर / ८
आटपाडी - सांगली / ४
तासगाव - सागंली /६
विटा - सांगली / ४
जत - सागंली / ६
पलूस - सांगली / ४

आगारनिहाय प्रतिदिवस सरासरी वाहनाचा वापर

सांगली : ८५, मिरज : ८०, विटा : ७३, ईश्वरपूर : ७०, तासगाव : ६७, जत : ७६, आटपाडी : ५५, कवठेमहांकाळ : ५९, शिराळा : ५०, पलूस : ३८, एकूण : ६५३

प्रवासीसंख्या वाढविण्यासाठी केलेले प्रयत्न

• लांब व मध्यम फेऱ्यांच्या वाहतुकीत वाढ केली.
• पुणे वाहतुकीसाठी जादा १५०, तर मुबंई वाहतुकीसाठी जादा १० वाहनांची सोय.
• आरक्षण नोंदणीची वेळ वाढवली.
• रातराणी वाहतुकीत वाढ.
• वाहनांच्या बिघाडांची संख्या रोखण्यात यश
• मनुष्यबळाचे सुयोग्य नियोजन
• पर्यवेक्षक अधिकाऱ्यांना मार्गनिहाय फेऱ्यांचे पालकत्व सोपवले.
• व्हिडीओ कॉन्फरन्सिंगद्वारे विभागप्रमुखांचे आगारप्रमुखांना वेळोवेळी मार्गदर्शन

सांगली विभागीय कार्यालयाने सर्व १० आगारांचे विविध पातळ्यांवर सुयोग्य नियोजन केले होते. प्रवासी मागणीनुसार, गर्दीच्या व ग्रामीण मार्गावर वाहने व त्यांच्या फेऱ्यांमध्ये वाढ केली. उपलब्ध मनुष्यबळाचा योग्य वापर केला गेला. आगारस्तरावर चांगला प्रतिसाद मिळाला. चालक, वाहक व अधिकारी यांच्या मेहनतीमुळे विभागाला प्रवासी संख्या वाढविण्यात यश मिळाले. - सुनील भोकरे, विभाग नियंत्रक, सांगली