मंडणगड : मोसमी पावसाच्या सुरुवातीला मंडणगड बसस्थानक इमारतीच्या छतास लागलेली गळती व त्यामुळे झालेली प्रवाशांची गैरसोय यावर झालेल्या सार्वत्रिक चर्चेनंतर आगार व्यवस्थापनास नुकतीच जाग आली आहे. गळती लागलेल्या भागात प्लास्टिक कापड टाकून गळती थांबविण्याचा प्रयत्न करण्यात येत आहे.
तालुक्यातील स्थानिक मुद्रित माध्यमांनी बसस्थानक परिसराची दुरवस्था हा विषय उचलून धरला. या समस्येसंदर्भातील प्रवाशांच्या मनातील खदखद लक्षात घेत आगार व्यवस्थापनाने भर पावसात छतावर माणसे चढवून प्लास्टिक टाकले. अजूनही मोसमी पावसाचे तीन महिने बाकी असल्याने आगारव्यवस्थापनाने तात्पुरत्या स्वरुपात केलेल्या उपाययोजना टिकतील की नाहीत, याविषयी शंका आहे. गतवर्षी २ जून २०२० रोजी शहरात आलेल्या निसर्ग चक्रीवादळात बसस्थानकाच्या छपराची नासधुस झाली. यास एक वर्षाचा कालावधी पूर्ण झाला आहे. एक वर्षात गळतीवर समस्या शोधण्यासाठी पुरेसा कालावधी असतानाही आगार व्यवस्थापनाने दुर्लक्ष केले आहे. आगाराची मुख्य इमारतही याच समस्येने ग्रस्त आहे. आगार व्यवस्थापनाच्या या अजब कारभाराबद्दल तालुक्यातून नाराजी व्यक्त होत आहे.